इरफान खानया निधन

येँ – बलिउड अभिनेता इरफान खान थौं मन्त । म्हिगः वयागु स्वास्थ्यय् समस्या जुइवं मुम्बइ स्थित कोकिलाबेन अस्पतालय् आइसियुलय् भर्ना याःगु खः । खान छुं ई न्ह्यव निसें न्यूरोएंडोक्राइन ट्युमरं पीडित जुयाच्वंम्ह खः । प्यन्हु न्ह्यव जक वया मां नं मदुगु खः । जयपुर च्वनाच्वंम्ह मां मदुबलय् लकडाउनया कारणं इरफान मांया अन्तिम संस्कारय् नं सहभागी जुइमखंगु खः ।

म्हिगः वयात छु कारणं अस्पताल यंकूगु खः धयागु पूवंक विवरण धाःसा बिउगु मदुनि । आइसियुलय् भर्ना यायेधुंकाः वयात कोलोन संक्रमण जूगु खँ जक धाःगु खः ।

दछि न्ह्यव लन्डनय् ट्युमरया उपचार याना वयेधुंकाः कोकिलाबेन अस्पतालया हे चिकित्सकतय् रेखदेखय् च्वनाच्वंगु खः । उपचार लिपा इरफान अंग्रेजी मिडियम फिल्म म्हितूगु खः । थ्व फिल्मया सुटिङ्गया इलय् नं वयागु स्वास्थ्य समस्या वयाच्वनीगु खँ युनिटयापिंसं धाःगु दु ।