संघनायक ज्ञानपूर्णिक महास्थविरया राष्ट्रिय सम्मानसहित अन्त्येष्टि

येँ (नेपालभाषा टाइम्स) – संघनायक भिक्षु ज्ञानपूर्णिक महास्थविरया राष्ट्रिय सम्मानसहित अन्त्येष्टि जूगु दु। म्हिगः यलया शंखमूलय् वसपोलया बौद्धपरम्परा कथं अन्त्येष्टी जूगु खः । वसपोलयात कार्यवाहक संघनायक भिक्षु बोधिसेन महास्थविर व अखिल नेपाल भिक्षु महासंघया अध्यक्ष भिक्षु मैत्री महास्थविरं मी तयाबिज्याःगु खःसा थ्व लिपा वसपोलया थः लाःपिं श्रीदेवी गुभाजु, प्रदीप वज्राचार्य व रम्भा शाक्यं संस्कारया ज्या याःगु खँ भिक्षु निग्राधं कनाबिज्याःगु दु ।

वसपोलया सीम्हय् मी तये न्ह्यः पुलांम्ह मन्त्री व सांसद कृष्णगोपाल श्रेष्ठं नेपाःया ध्वाँय् फायेकादीगु खः । थ्व झ्वलय् नेपाली सेनाया छगू टुकडीं सलामी बिउगु खः । संघनायक भन्ते वंगु शुक्रवाः सुथय् मदुगु खः । थ्व लिपा शुक्रवाःनिसें वसपोलया सीम्ह विश्वशान्ति विहारय् तयातःगु खःसा म्हिगः न्हिनय् विहारं हे सिथं यंकूगु खः । जलास्येँया ल्वचं कयाच्वंम्ह वसपोल ८१ दँया वैशय् मदुगु खः।