निषेधाज्ञाय् तिंख्यःध्वाखाया न्हूगु रुप

येँ – निषेधाज्ञा जुयाच्वंगु इलय् लाकाः येँया दकलय् व्यस्त लागा न्हूसतकया तिंख्यः ध्वाखा बल्लाकेत प्रवलीकरण यायेगु ज्या न्ह्याःगु दु । थुकी ध्वाखायात बल्लाकेगु नापं सौन्दर्यकरण यायेगु ज्या नं जुइ ।

आः जुयाच्वंगु प्रवलीकरणया ज्याय् ध्वाखायात बांलाकेगु नापं थुकियात येँ देय्या स्थानीय पहः वयेकीगु खँ वडा नं. २२ या वडाध्यक्ष चिनीकाजी महर्जनं कनादिल ।

वि.सं. १९९० या तःभुखाय् लिपा न्हू सतक दयेकूगु इलय् हे थ्व ध्वाखा नं दयेकूगु खः । वयां लिपा थीथी इलय् थ्व ध्वाखा मर्मत यायेगु व रंग पायेगु ज्या जुइधुंकूगु दु । आः ४५ लाख तका खर्च यानाः तिंख्यः ध्वाखा प्रवलीकरण व सौन्दर्यकरण यायेत्यनागु खँ नं वडाध्यक्ष महर्जनं कनादिल ।

येँ महानगरपालिकापाखें मुक्कं न्हू सतक लागायात हे न्हूगु स्वरुप बीगु लागिं सौन्दर्यकरणया छगू गुरुयोजना दयेकेधुंकूगु दु । आः तिंख्यःध्वाखाया प्रवलीकरण यायेगु ज्या नं उगु हे गुरुयोजनाया छगू अंग कथं न्ह्यानाच्वंगु खँ नं वडाध्यक्ष महर्जनं ‘नेपालभाषा टाइम्स’ यात कनादिल ।

येँ महानगरपालिकां दयेकूगु न्हू सतकया गुरुयोजना कथं तिंख्यःध्वाखांनिसें जुद्ध शमशेरया सालिक तक व अनं जवय् वंघः तक, खवय् धर्मपथ तकया लँपुयात पूवंक हे न्हूधाः यायेगु ग्वसाः यानातःगु दु । थुकी सतकया जःखः च्वंगु बार न्हूकथं तयेगु, मत तयेगु थांयात नं चीकाः धुन्या शैलीया थां दयेकाः उकी मत तयेगु कथं डिजाइन यानातःगु दु ।

वडा अध्यक्ष महर्जनया कथं राजधानीया दकलय् व्यस्त बजाः जूगुया नापनापं पिनेयापिं आपालं मनूत वइगु मू केन्द्र थें जूगु कारणं नं थुकियात न्हूगु रुप बी माःगु आवश्यकता महानगरपालिकां याःगु खः ।

सम्बन्धित बुखँ

LEAVE YOUR COMMENTS