मेलम्चीया इटालियन ठेकेदार लिहां वइगु सम्भावना म्हो, धरौटीया दामं ल्यं दुगु ज्या
येँ – मेलम्ची परियोजनायात दथुइ हे त्वःताः बिसिउँ वंगु इटालिएन कम्पनी सीएमसी हानं लिहां वये धाःसां नेपाःया थीथी प्यंगू बैंकय् तयातःगु धरौटी नवीकरण मयात धाःसा उमिसं ज्या याये मखनीगु खँ धाःगु दु । सीएमसीं थ्व परियोजना सञ्चालन यायेगु लागिं नेपाःया थीथी गुंगू बैंकय् धरौटी तयातःगु दु । उकी मध्ये प्यंगूया धरौटी थौं तकया दुने नवीकरण यायेमाः । बाँकी न्यागूया धरौटी नवीकरण यायेगु म्याद धाःसा आकिवं तक दु । यदि सीएमसीं थौं तकया दुने थ्व प्यंगू धरौटी नवीकरण मयात धाःसा वं मेलम्चीया ज्या न्ह्याके मफइगु खँ सूत्रं धाःगु दु ।
तर खानेपानी मन्त्रालयं धाःसा सीएमसीं ज्या मयाःसां आः मेलम्चीया ल्यं दुगु ज्या नेपाः थःपिंसं हे याये फइगु दावी याःगु दु । सीएमसीं मेलम्चीया जिम्मा थःपिंसं काःगु खःसां उकिया ज्या धाःसा नेपाःया हे थीथी स्थानीय ठेकेदारतय्त हे याका तःगु खः । आः नेपाः सरकारं थ्व ज्या याये माल धाःसा वहे न्हापा ज्या यानाच्वंपिं नेपाःया हे सहायक ठेकेदारतय्त हे ज्या बियाः न्ह्यःने न्ह्याकेगु ग्वसः ग्वयाच्वंगु दु । मेलम्चीया ज्या यानाच्वंपिं नेपाःया हे सहायक ठेकेदारतलिसे उकिया लागिं अनौपचारिक खँल्हाबल्हा जुयाच्वंगु खँ सूत्रं धाःगु दु । इटालियन कम्पनी सीएमसीं ज्या त्वःताः बिसिउँ वनेवं आः थःपिनि काये ल्यं दनिगु ध्यबा छु यायेगु धकाः सहायक ठेकेदारत चिन्तित जूगु खः । उकिया लागिं सहायक ठेकेदारत छप्पँ जुयाः सः तयेगु कुतः नं जूगु खः । तर नेपाः सरकारं वहे सहायक ठेकेदारतय्त बाँकी ज्या नं याकाः भुक्तानी यायेगु बिचाः यानाच्वंगु खँ धाःगु दु ।
मेलम्ची परियोजनया ज्या आः तक ९७ प्रतिशत क्वचायेधुंकूगु दु । बाँकी ज्या सीएमसीं नेपाःया थीथी बैंकय् तयातःगु धरौटी दामं हे सम्पन्न याये फइगु खँ धाःगु दु । सीएमसीं नेपाःया थीथी गुंगू बैंकय् २ अर्ब ५६ करोड तका दां धरौटी तयातःगु दु । थ्व दां सरकारं जफत यात धाःसा ल्यं दुगु ज्या थ्वहे दामं सम्पन्न याये फइगु खँ धाःगु दु ।
सीएमसीं न्हूदँ न्यायेकाः हानं लिहां वयाः मेलम्चीया ज्या यायेगु प्रतिवद्धता प्वंकूगु खः । तर खानेपानी मन्त्रालयं धाःसा मेलम्चीयात आः पत्याः याये मफइगु खँ धाःगु दु । छुं जुयाः धरौटी नवीकरण यानाः सीएमसी ज्याय् लिहां हे वल धाःसां नं वयालिसे तसकं होशियारीपूर्वक जक ज्या याये मालीगु खँ धाःगु दु ।
LEAVE YOUR COMMENTS