छवाःया दुने हे खुल्लामञ्या बसपार्क खाली याइगु

येँ -येँ महानगरपालिकां छवाःया दुने हे खुल्लामञ्या बसपार्क खाली याइगु जूगु दु । ताः ई तक खुल्ला मञ्च अतिक्रमण यानाः बसपार्क तयाच्वंगुलिं आलोचना जुइवं येँ महानगरपालिकां थनया बसपार्क चिइकेत्यंगु खः ।

येँ महानगरपालिकाया प्रवक्ता ईश्वरमान डंगोलया कथं पुलांगु बसपार्कय् दयेकाच्वंगु काठमाडौं टावरया पार्किङस्थल दयेकेगु ज्या क्वचाःगुलिं बसपार्क अनं चीकेगु तयारी जुयाच्वंगु खँ धयादीगु दु । ‘नेपालभाषा टाइम्स’ लिसें खः ल्हायेगु झ्वलय् वय्कलं धयादिल, ‘काठमाडौं टावरया अन्डरग्राउन्ड दयेकेगु ज्या क्वचायेधुंकूगु दु, आः वइगु नगरपालिकाया बैठकं खुल्लामञ्चं बसपार्क चीकेगु निर्णय यायेफु ।’

काठामाडौं टावरय् बसपार्क दयेकूसां नं न्हापाथें अन हे बस दिकेगु सुविधा धाःसा मदइगु खँ धाःगु दु । आः काठमाडौं टावरय् बसपार्क कथं मखुसे पिक एन्ड ड्रप कथं जक सञ्चालन यायेगु तयारी जुयाच्वंगु दु । खुल्लामञ्चय् बसपार्क दयेकेवं स्वनिगलय् ट्राफिक जामया समस्या अप्वःगुलिं यानाः बसपार्क कथं मखुसे पिक एन्ड ड्रपया अवधारणा हयेमाःगु खँ येँ मनपां धाःगु दु ।

खुल्ला मञ्चं बसपार्क चीकेधुंकाः उगु लागाय् हरियाली अप्वयेकेगु निंतिं सीमा पीगु लिसें अनया वातावरण स्वच्छ यायेगु योजना दुगु खँ नं प्रवक्ता डंगोलं कनादीगु दु ।