आः मास्क मतःसा बं पुइकी

येँ -पिनें स्वनिगलय् दुहां वइपिंसं आः अनिवार्य रुपं एन्टिजेन परीक्षण याये मालीगु जूगु दु । येँ जिल्ला कोभिड–१९ संकट व्यवस्थापन समितिया म्हिगः च्वंगु बैठकं स्वनिगलय् दुहां वइपिं हरेक मनूतय्त आः सम्बन्धित नगरपालिकातय्सं नाकाय् एन्टिजेन परीक्षण यायेगु व्यवस्था याःगु खः ।

म्हिगः जूगु निर्णय कथं स्वनिगलय् कोरोना संक्रमण नियन्त्रण यायेगु निंतिं स्वनिगःया फुक्क धइथें नगरपालिकाय् एन्टिजेन परीक्षण यायेगु व हेल्थ डेस्क तइगु जूगु दु । उकथं हे एन्टिजेन परीक्षणय् नेगेटिभ जूपिं व लक्षण खने दयाः शंकास्पद जूपिंत पीसीआर परीक्षण यायेत निंतिं स्वाब संकलन नं याइ ।

स्वनिगलय् संक्रमण नियन्त्रण यायेगु निंतिं फुक्क धइथें नगरपालिकाय् एन्टिजेन टेस्ट यायेगु, नाकाया नगरपालिकां हेल्थ डेस्क स्थापना यायेगु, सम्पर्क मनू क्वःछीगु, संक्रमण जूपिनिगु पीसीआर टेस्ट यायेगु लिसें कन्ट्याक्ट टे«सिङ यायेगु निर्णय नं याःगु दु ।
उकथं हे फुक्कं नगरपालिकाय् न्ह्यानाच्वंगु आइसोलेसन केन्द्र व क्वारेन्टाइन केन्द्रयात अध्यावधिक यायेगु, स्वनिगःया फुक्कं नगरपालिकाय् म्होतिं नं छगू आइसोलेसन केन्द्र व क्वारेन्टाइन सञ्चालन निर्णय नं याःगु दु ।

अथे हे स्कुलय् विद्यार्थीतय्त चेतनामूलक ज्याझ्वः न्ह्याकेगु, विद्यार्थी–यात मास्क तयेगु लिसें कक्षा क्वथा व्यवस्थित यायेगु ज्या शिक्षा कार्यालयपाखे यायेगु निर्णय नं याःगु दु । स्कुलय् साब्वनं ल्हाः सिलेगु, सेनिटाइजर छ्यलेगु अनिवार्य याइगु जूगु दुसा संक्रमण म्हो यायेगु निंतिं स्वनिगःया फुक्कं नगरपालिकापाखें प्रचार प्रसार यायेगु व मापदण्ड पालना मयात धाःसा जरिवाना समेत यायेगु निर्णय नं याःगु दु ।

उकथं हे थनिंनिसें नेपाल प्रहरीं थीथी थासय् हेल्प डेस्क तयाः मास्क तः वा मतः अनुगमन याइगु जूगु दु । मास्क मदुपिंत मास्क इनेगु लिसें मतल धाःसा सछि तका बं पुइकेगु निर्णय नं याःगु दु । अथे हे सार्वजनिक यातायात अनुगमन यायेगु व यात्रीतय्त मास्क अनिवार्य याइगु जूगु दु ।

थ्वहे झ्वलय् स्वास्थ्य मन्त्री हृदयेश त्रिपाठीं स्वास्थ्य मापदण्ड पालना मयात धाःसा थगुने थें कोरोना संक्रमण अप्वये फइगु खँ धयादीगु दु । म्हिगः प्रतिनिधिसभाया बैठकय् न्ववासें वय्कलं धयादिल, ‘कोरोना संक्रमण माघंनिसें म्हो जुया वनाच्वंगु खः, लिपांगु इलय् संक्रमितया ल्याः अप्वया वनाच्वंगु दु ।’

वय्कलं भारतय् अप्वया वनाच्वंगु प्रभाव नेपालय् लाये फइगु खँ कँसें आः संक्रमण नियन्त्रण यायेत आइसोलेसन, अनिवार्य क्वारेन्टाइनया व्यवस्था यायेमाःगु खँ नं धयादीगु दु ।