ने. सं. ११४४ कौलाथ्व पारू - नःलास्वनेगु

जैशिदेवल डोजाङया कासामिपिंत ट्राय्कशुट

येँ -जैशिदेवल युथ क्लबया ग्वसालय् जैशिदेवल तेक्वान्दो डोजाङ जुनियर ग्रेडिङ व प्रमाणपत्र वितरण ज्याझ्वः जुल । लिसें उगु हे ज्याझ्वलय् क्लबया ग्वसालय् वंगु माघय् जूगु न्हापांगु मेयर कप आमन्त्रण तेक्वान्दो कासाय् विजयी क्लबया कासामिपिंत छगू ज्याझ्वःया दथुइ ट्राय्कशुट नं लःल्हाःगु खः ।

क्लबया अध्यक्ष राजेश प्रजापतिया सभापतित्वय् जूगु ज्याझ्वलय् उच्च माध्यमिक व माध्यमिक विद्यालय एशोसियसन नेपाल (हिसान)या उपाध्यक्ष युवराज शर्मा मूपाहांकथं झायादीगु खः । अथे हे ज्याझ्वलय् तेक्वान्दो संघया बागमति प्रदेश उपाध्यक्ष प्रकाश खड्गी, संघया पूर्व जिल्ला अध्यक्ष कविराज खड्गी, जिल्ला अध्यक्ष अशोक खड्का, उपप्राध्यापक सागरदास रञ्जित, क्लबया सल्लाहकार मधुसुदन प्रधान, राजेश शर्मा विशेष पाहांकथं झायादीगु खः ।

ज्याझ्वलय् मूपाहां व विशेष पाहांपिंसं वंगु माघ २३ व २४ गते क्लबया ग्वसालय् जूगु तेक्वान्दो कासाय् सहभागि क्लबया कासामिपिंत प्रिफेक्स नेपालया सौजन्यं प्राप्त ट्राय्कशुट लःल्हानादीगु खः । अथे हे जुनियर कासामिपिंत नं ग्रेडिङया कासामिपिंत प्रमाणपत्र नं लःल्हाःगु खः । वय्कःपिंत बागमति प्रदेश उपाध्यक्ष खड्गी व जिल्ला संघया अध्यक्ष खड्कां प्रमाणपत्र लःल्हानादीगु खः ।

उगु इलय् क्लबया महासचिव चन्द्रगोपाल प्रधानं कासाय् उत्कृष्ट कसामि घोषित सुरेश लिम्बुयात सम्मान स्वरुप तेक्वान्दो डोबक लःल्हानादीगु खः । मूपाहां शर्मां डोजाङया निम्ह उत्कृष्ट कासामियात ह्वाइट हाउस कलेजय् छात्रवृत्ति बीगु घोषणा यानादीगु ज्याझ्वलय् क्लबया महासचिव प्रधानं लसकुस यानादीगु खःसा सभापति प्रजापतिं मूपाहां व ग्वाहालि यानादीपिंत मतिनाया चिं लःल्हानादीगु खः ।