युरोपियन युनियनयात खस आर्य नेतातय् लिसः

सम्पादकीय

युरोपियन युनियनं खस आर्य जातियात आरक्षणं लिकायेमाः धकाः छगू लाइन छु न्ववात, खस आर्य जातियापिं फुक्क हे नेतात हाप्वलं हा दना वये थें दना वल । ह्वायांयांयां….. युरोपियन युनियनं मखुथाय् हे अप्पां कयेकल थें च्वं ! ईयुया थ्व धापूयात ब्वः बीगु ज्याय् दकलय् न्ह्यःने खने दयेकः झाल नयाँ शक्तिया अध्यक्ष डा. बाबुराम भट्टराई । वयां लिपा एमालेया योगेश भट्टराई । अले राप्रपाया कमल थापा । पार्टी अलग अलग, जाति छगू हे । गुलि मिले जू ! आदिवासी जनजातितय् अथे जुइ मखु । नेवाःतय् ला झन् हे जुइ मखु । नेवाःत छगू हे जाति दुने च्वंसां उमित थःगु पार्टी तःधं जुइ । छगू हे पार्टी दुने नं अझ थःगु गुट तःधं जुइ । गुट दुने नं थः नेता तःधं जुइ । अलग अलग पार्टीयापिं खःसां थःगु जातिया सवालय् छगू हे सः पिकायेगु ज्या नेवाःतय्सं याइ मखु । अझ गुलिं नेवाः नेतातय्सं ला थथे नं धाइ तिनि – थथे नेवाः नेवाः धयां नं जी ला ? देशया खँ ल्हा ले देशया !
नेपाःया संविधानय् छुं नं जातिया नां उल्लेख जुयाच्वंग दुसा व खस आर्य जातिया जक खः । मेगु छुं हे जाति जनजातिया नां उल्लेख मदु । उकिं संविधानं सुयातं आरक्षित यानातःगु दुसा व खस आर्य जातियात जक खः । नेपाःया आदिवासी जनजाति, मधेसी, दलिततय्सं ला थुकिया विरोध याना च्वंगु हे खः । आः युरोपियन युनियनं नं वहे खँ छक्वः न्ववाना बीवं खस आर्य समाज छथुं हे उत्तेजित जुया वल । न्ह्याक्व हे जातिया खँ ल्हाये मजिउ धयाच्वंसां जब थःगु जातियात आक्रमण याइ, तब उपिं गय् छप्पँ जुइ, थ्व खँ नेवाः लगायत आदिवासी जनजातितय्सं झी खस आर्य नेतातपाखें सयेकेगु खः कि ?

सम्बन्धित बुखँ

LEAVE YOUR COMMENTS