स्कुल गय् यानाः ल्ययेगु
भर्ना जुइत्यनागु स्कुलया न्हापाया रिजल्ट स्वयेमाः
दकलय् न्हापां एसईई थःत वःगु ग्रेड स्वयां थःम्हं छु ब्वनेगु धयागु निं क्वःछीमाः। थम्हं छु विषय कयाः ब्वनेगु धकाः क्वःछी धुंकाः प्लस टु स्कुलय् भर्ना जुइबलय् छु स्कुलय् भर्ना जुइगु खः व स्कुलया बारे बांलाक सिइकेमाः।
थुकिया निंतिं दकलय् न्हापां स्वयेगु धयागु उगु स्कुलं न्हापा न्हापा बियाच्वंगु रिजल्ट हे खः। थनं न्हापा ब्वनावंपिं विद्यार्थीतय्गु रिजल्ट गज्याःगु वःगु दु, गुलि पास जूगु दु। पास जूपिंसं गुलि प्रतिशत हयाः पास याःगु दु व स्वयेमाः।
रिजल्ट बांलाक वःथाय् ब्वंकेगु तरिका बांलाःगु हे जुइ। स्कुलय् वनेगु धयागु ब्वनेगु निंतिं हे खः। उकिं बांलाक ब्वंकीगु स्कुल स्वये हे माः।थुकिया लिसें थः भर्ना जुइगु स्कुलया भौतिक पूर्वाधार नं स्वयेमाः। पुस्तकालय् गज्याःगु दु, ल्याब दु कि मदु, म्हितेगु थाय् गुलि दु, प्राक्टिकल यायेत ल्याबया व्यवस्था गज्याःगु दु, कक्षाक्वथा वातावरणनुकुल जू कि मजू थज्याःगु खँय् नं ध्यान तयेमाः।
अथे हे ब्वंकेगु तरिका गज्याःगु दु थ्व खँय् नं दुवालाः स्वयेमाः। समयसापेक्ष कथं ब्वंकेगु तरिकाय् हिउपाः हयाच्वंगु दु कि मदु स्वयेमाः। थौंया इलय् सामान्य स्कुलय् ब्वने थें मजिल, ई परिस्थिति कथं न्हून्हूगु प्रविधि नाला कयाच्वंगु दु कि मदु ध्यान बीमाः। न्ह्याबलें थें परम्परागत विधिं जक ब्वनाः थौंकन्हय् मजिउ।
थ्व धुंकाः अन ब्वंकीपिं शिक्षकत अनुभवीपिं खः कि मखु धयागु नं सिइकेमाः। थौंकन्हय् स्कुलतय्सं अप्वः ध्यबा बीमाली धकाः पुलांपिं अनुभवीपिं शिक्षकतय्त लिकयाः न्हूपिं, नकतिनि नकतिनि पास याना वःपिं शिक्षकत जक तयेगु नं याः।उकिं शिक्षकत गज्याःपिं खः धयागु नं ध्यान बीमाः।
न्हापाया रिजल्ट स्वयेबलय् बांलाः, उबलय् तक अनुभवी शिक्षक जुयाच्वनी, हाकनं थुगुसी उमित लिकयाः न्हूपिं शिक्षकत तःगु नं जुयाच्वनेफु। अभिभावकपिंसं थज्याःगु खँय् बांलाक बुझे याना स्वयेगु हे थः मस्तय् भविष्यया निंतिं भिं जुइ।थुकिया लिसें फी स्ट्रक्चरय् नं ध्यान बीमाः।
भौतिक सुविधा जक स्वयाः थम्हं पुले हे मफयेक शुल्क काइथाय् मस्तय्त भर्ना यायेमजिउ। मस्तय्सं नं थः मांअबुया अवस्था थुइकाः शुल्क पुलेफइथाय् जक ब्वनेगु बांलाइ।मस्तय्त ब्वं जक ब्वंकां मजिउ। थौंकन्हय्या इलय् मस्तय्त फुक्क ख्यलय् च्वन्ह्याकेमाः। थुकिया निंतिं अतिरिक्त क्रियाकलाप उतिकं आवश्यक जू।
उकिं मस्त ब्वंकेगु स्कुलय् न्हापा गज्याःगज्याःगु अतिरिक्त क्रियाकलाप याकाच्वंगु धयागु नं न्यनेकने यानाः स्वयेमाः। थुकिया लिसें थःत पायक जूथाय् नं स्वयेमाः। थः भर्ना जुइगु स्कुलतक थ्यंकेगु निंतिं यातायात सुविधा नं स्वयेमाः। स्कुलया बस कायेगु जूसा ला ठीक हे जुल, अथे मखुसा अन तक थ्यंकेगु सवारी साधन गुकथं दु धयागु नं ध्यान बीमाः।
विषय ल्ययेबलय् स्कुलया शिक्षकतय्गु सुझाव काःसा बांलाइ
दकलय् न्हापां एसईई थःत छु ग्रेड वल व स्वयाः थम्हं छु विषय कयाः ब्वनेगु खः, व निं क्वःछीमाः। थौंकन्हय् ६०÷६५ गू ला ब्वनेगु जक विषय दु। म्यानेजमेन्ट, साइन्स, ह्युमानिटिज जक मखु थौंकन्हय् आर्ट, स्पोर्टया लिसें प्राविधिक विषयत यक्व ब्वनेगु दु।
उकिं थःतः वःगु स्कोर कथं थम्हं छु ब्वनेगु खः, व निं क्वःछीमाः। थथे विषयय् ल्ययेबलय् नं थःगु जीवनया लक्ष्य छु खः धयागु नं थुइकेमाः। ए प्लस वल धायेवं सकस्यां साइन्स हे ब्वनेमाः धयागु मदु। यदि थःत लिपा शिक्षक जुइगु इच्छा दुसा साइन्स कयाः ब्वनां मजिल, एजुकेशन हे कयाः ब्वनेमाल।
उकिं मांअबुं नं मस्तय्गु रहर छु धयागु थुइकाः उमिसं ब्वने इच्छा याःगुलिइ ब्वंके बीमाः। जीवनय् गन वनेगु धयागु लक्ष्य थुइकाः पलाः तल धाःसा जक सफलता चूलाइ। विषय ल्ययेबलय् थम्हं ब्वनावयागु स्कुलया शिक्षकतय्गु सुझाव नं कायेमाः। मस्तय्सं गुलि ब्वनेफु, छु ब्वने फइ धयागु खँ मांअबुं स्वयां शिक्षकतय्सं सिइ।
गुलिंगुलिंसिनं ए प्लस ला हःगु दइ, तर वं जाँच बिउबलय् खुयाः जाँच बिउगु नं जुइफु। तर धाथें व मचाया बारे ला शिक्षकं जक सिइ, वं गुकथं ब्वनी धयागु खँ। उकिं शिक्षकया सुझाव कायेगु नं बांलाइ।विषय ल्यये धुंकाः स्कुलय् भर्ना जुइगु जुइ। स्कुल भर्ना जुइबलय् थः मांअबुया गच्छे स्वयाः स्कुल ल्ययेमाः।
स्कुल ल्ययेबलय् अन स्कुलया भौतिक पूर्वाधार जक स्वयां मजिउ, उगु स्कुलं न्हापा हयाच्वंगु रिजल्ट नं स्वयेमाः। अथे हे अन स्कुलय् ब्वनावंपिं मस्तय् अभिभावकपिनि बिचाः नं न्यनेमाः।एसईई पास जुल धायेवं मस्त म्याच्योर जुइमखु। उमित नं स्कुलय् थें बिचाः यानातयेमाः। उकिं उगु स्कुलय् मस्तय्त गुकथं स्वइ, गुकथं ध्यान बी धयागु खँ अभिभावकतय्सं सिइके हे माः।
स्कुलया इन्टरनल म्यानेजमेन्ट स्वयेमाः, अनया फ्याकल्टि मेम्बरत गज्याःगज्याःपिं दु सिइकाः, थुइकाः स्कुल ल्यल धाःसा बांलाःगु निर्णय जुइ।थौंकन्हय् अप्वः थें शिक्षा व्यावहारिक जुइ। व्यावहारिक शिक्षाया निंतिं प्राक्टिकल यक्व याकेमाः। गुलिं गुलिं स्कुलं होटल म्यानेजमेन्ट ला ब्वंकाच्वंगु दइ, तर अन प्राक्टिकल यायेत किचेन तकं दइमखु।
दछिया छक्वः गनं होटलय् यंकाः छन्हु तयाः प्राक्टिकल याकाहइ, तर ध्यबा धाःसा लय्लय् कयाच्वंपिं नं दइ। भौतिक पूर्वाधार स्वयेबलय् थज्याःगु प्राक्टिकल रुम, कम्प्यूटर रुम, पुस्तकालय, अतिरिक्त क्रियाकलाप आदि बारे फुक्कं खँ सिइकाः स्कुल ल्यल धाःसा हे बांलाइ।
LEAVE YOUR COMMENTS