सत्तापक्षीय सांसदपाखें नं विधेयकया विरोध

येँ – सत्तारुढ नेपाल कम्युनिष्ट पार्टी (नेकपा) या सांसदं गुथि विधेयक लित कायेमाःगु माग यानादीगु दु । वय्कलं विधेयक लित मकाल धाःसा सांस्कृतिक दंगा तच्वया वनेफु धासें उकिया जिम्मेवारी प्रधानमन्त्रीं काये मालीगु ख्याच्वः नं बियादीगु दु । वय्कलं म्हिगः रिपोर्टर्स क्लबया ग्वसालय् जूगु ज्याझ्वलय् न्ववासें उगु खँ धयादीगु खः । वय्कलं नेपाःया धर्म, संस्कृति व समाजयात लिच्वः लाइ कथं भूमाफिया व दलालत लिसे जानाः विधेयक हःगु द्वपं नं बियादिल । वय्कलं गुथियात सामन्ती संस्कार धाइम्ह सरकारया प्रवक्ता सञ्चारमन्त्री गोकुल बास्कोटां राजीनामा बीमाःगु माग नं यानादीगु दु ।

गुथियात सामन्ती प्रथा लिसे स्वाःगु धासें सांसद मानन्धरं आपत्ति प्वंकादीगु दु । ‘गुथिया विरोधय् आन्दोलन जुयाच्वंगु दु, तर सतकय् कुहां वयाच्वंपिं जनतायात सान्त्वना बीगु स्वयां नं च्यानाच्वंगु मिइ घ्यः लुइगु ज्या सञ्चार मन्त्रीं यानाच्वंगु दु’ सांसद मानन्धरं धयादी । वय्कलं सञ्चारमन्त्रीं माफी फ्वनेमाः धासें मखुसा राजीनामा बीमाःगु माग नं यानादीगु दु ।

सांसद मानन्धरं प्रधानमन्त्री केपी ओली स्वदेश लिहां वयेधुंकाः विधेयक लित कायेगु निर्णय मयात धाःसा येँय् आन्दोलनया धाकुफय् वइगु ख्याच्वः नं बियादिल । वय्कलं धयादी, ‘जिं थनं धयाच्वना, यदि प्रधानमन्त्रीं नं विधेयक लित काये मखु धाल धाःसा स्वया हुँ स्वनिगलय् छु जुइ ।’

सांसद मानन्धरं स्वनिगःया संस्कृति व परम्परायात हाथ्या बीकथंया विधेयक खेदजनक व खारेज यायेमाः धासें तत्काल फुक्कं पक्षलिसे वार्ता यायेत नं इनाप यानादीगु दु । अथे हे पुलांम्ह रक्षामन्त्री लिसें सांसद भीमसेनदास प्रधानं गुथि विधेयक लित मकाःतले संसद न्ह्याके मबीगु ख्याच्वः बियादिल । वय्कलं सञ्चारमन्त्रीं धर्म संस्कृति बारे मथूगु बिडम्बना जूगु खँ धयादिल ।

उकथं हे प्रदेश ३ या नेकपा सांसद राजेश शाक्यं नं थ्व विधेयक लित कायेमाःगु बिचाः तयादीगु दु । म्हीग प्रदेश सभाय् न्ववासें वय्कलं विधेयकया दफा २३, २४, २५ व २६ अतिकं आपत्तिजनक दुगु खँ धासें स्वनिगःया गुथि बारे छुं हे मसीक थ्व विधेयक तयार याःगु द्वपं बियादिल । वय्कलं नेपाःया झिगू विश्व सम्पदा मध्ये ७ गू स्वनिगः दुने लानाच्वंगु धइगु हे गुथि प्रणालीं यानाः खः धासें थज्याःगु खँयात राज्यं थुइके मफुगु दुःखया खँ खः धयादिल ।

उकथं हे सत्तापक्षया प्रदेश सभा सांसद राजकाजी महर्जनं नं विधेयकया विरोध यासें लित कायेमाःगु माग यानादीगु दु ।

सम्बन्धित बुखँ

LEAVE YOUR COMMENTS