सुख्खा बन्दरगाहया विरोध

चोभारय् सुख्खा बन्दरगाह दयेके मबीगु

येँ – चोभारय् सुख्खा बन्दरगाह दयेकेगु सरकारया ग्वसाःयात स्थानीय जनतां विरोध याःगु दु । चोभार संरक्षण समितिया संयोजक पञ्चलाल महर्जनं थन छगू वक्तव्य पिकासें चोभारय् हिमाल सिमेन्ट कारखानाया प्रदुषणं स्वीन्यादँ तक हसंमसं धयाः नकतिनि जक स्वच्छ वातावरणय् सासः ल्हायेखंपिं जनता व ऐतिहासिक, धार्मिक, सांस्कृतिक, प्राकृतिक रुपं महत्वपूर्ण चोभाः क्षेत्रयात तहसनहस याये कथं थ्व योजना हःगु जुयाः उकिया विरोध यानागु खँ धाःगु दु ।

राष्ट्रिय महत्वया योजना सञ्चालन यायेबलय् उकिं प्रभावित जुइपिं जनताया ग्वाहालि व समर्थन मदयेक जबर्जस्ती याये दइ मखु धासें वक्तव्यय् चोभाः क्षेत्रया सर्वाङ्गिक विकासया पंगःया रुपय् दयेकेत्यंगु सुख्खा बन्दरगाहया निर्माण ज्या तत्काल दिकेत माग यानातःगु दु ।

थ्व लागाय् हिमाल सिमेन्ट कारखाना दुगु इलय् अतिकं वातावरणीय प्रदुषण जुयाः जलविनायक, आदिनाथ, टौदह, मञ्जुरी गल्छी, गुफा, स्थानीय नखःचखःया लिसें थुगु क्षेत्रया ऐतिहासिक, पुरातात्विक, धार्मिक, सांस्कृतिक, प्राकृतिक सम्पत्ति खतराय् लाःगु धासें स्थानीय जनतां स्वंगू दशक तक संघर्ष यानाः कारखाना बन्द याकूगु खः ।

आः हिमाल सिमेन्ट चीकेधुंकाः चोभाः क्षेत्रया पहिचान जुयाच्वंगु सम्पदा ल्यंकेगु व उकियात पर्यटकीय थाय्या रुपय् विकास यायेगु लागिं कुतः जुयाच्वंगु दु । थ्व थाय्यात पर्यटकीय क्षेत्र कथं विकास यायेत कुतः जुयाच्वंगु इलय् हाकनं सुख्खा बन्दरगाह दयेकेगु ज्या उचित मजूगु खँ वक्तव्यय् धयातःगु दु ।

अन सुख्खा बन्दरगाह दयेकल धाःसा हिमाल सिमेन्टं थें हे हानं प्रदुषण पिकाइगु व उगु लागाया विकासय् पंगः जुइगु खँय् स्थानीय जनता चिन्तित जुयाच्वंगु दु । थ्वहे झ्वलय् अन सुख्खा बन्दरगाह दयेके दइ मखु धासें स्थानीय वासिन्दां किपू नगरपालिकाय् नं ज्ञापनपौ बिउगु दु । उगु लागाय् सुख्खा बन्दरगाह दयेकल धाःसा उकिं लाइगु लिच्वः बारे नगरपालिकायात ज्ञापन पौ बियागु खँ संयोजक महर्जनं ‘नेपालभाषा टाइम्स’ यात कनादिल ।

शिलान्यास याः वःसा प्रदर्शन

चोभारय् दयेकेत्यंगु उगु सुख्खा बन्दरगाहया शिलान्यास यायेत प्रधानमन्त्री केपी ओली झाइगु खँ वयाच्वंगु दु । अबले स्थानीय जनतां प्रधानमन्त्रीया न्ह्यःने हे विरोध यायेगु तयारी जुयाच्वंगु खँ नं सीदुगु दु ।

सम्बन्धित बुखँ

LEAVE YOUR COMMENTS