छखे पीच यानाच्वन, मेखे वहे पीच प्वलाच्वन !

येँ – मध्यपुर थिमि नगरपालिकाया भीमसेनचोक–बोडे खण्डय् बिहीवाः पीच यायेधुंकूगु सतक छम्ह स्थानीय मनुखं म्हुया बिउगु दु । पीच यानाः रोलरं सम्म यानाच्वंगु इलय् उम्ह मनुखं दयेके क्वचाःगु सतक म्हुइगु ज्या याःगु खः । सतक पीच जुयाच्वंगु इलय् स्थानीय वासिन्दां स्वयाच्वंगु खः ।

तर उम्ह मनुखं पीच याये क्वचायेधुंकूगु सतक बछि ब्व धयाथें स्यंका बिउगु खः । सतक पीच याःगु इलय् मेम्ह छम्ह मिसां नं थःगु जग्गा सतकय् लाःगु धासें विरोध यानाच्वंगु खः । सर्वोच्च अदालतं अन्तरिम आदेशपाखें सतक विस्तार याये मते धायेक धायेकं सतक विस्तार याःगु धासें उम्ह मिसां तं प्वंकूगु खः ।

थःगु तं प्वंकुसें उम्ह मिसां थिमिया मेयरं थःगु जक छेँ लाइकथं सतक नाप धाःगु द्वपं बिसें थः व थः दाजुभतया जग्गाय् जक सतक विस्तार यायेमाःगुया कारण छु धकाः नं न्ह्यसः तयादिल । वय्कलं धयादी, ‘सर्वोच्चया अन्तरिम आदेश तकं माने मयासे मेयर साबं ज्यादति यात ।’ वय्कलं थःपिंके स्पष्ट भ्वं दयेक दयेकं हे चांचां डोजर लगे यानाः सरकारं सतक दयेकूगु द्वपं नं बियादीगु दु ।

मेखे नगरपालिकां धाःसा छम्ह मनूया कारणं सतक विस्तार यानाः पीच यायेगु ज्या याये मफुगुलिं सामान्य बल छ्यलाः सतक पीच यानागु खँ धाःगु दु । नगरपालिकाया उपप्रमुख अञ्जनादेवी मधिकर्मीं ताः ई तक सतक अलपत्र त्वःतेबलय् स्थानीय वासिन्दायात सास्ती जूगुलिं विरोधया दथुइ सतक पीच यानागु खः धयादीगु दु ।

उपमेयर मधिकर्मीं स्थानीय जनतां विरोध याःगुलिं योजना स्वयां म्हो जक सतक पीच यानागु व उकी छम्हेसिया जक विरोध दुगु दावी यानादीगु दु ।