स्वयम्भू महाचैत्यपाखें विकास निर्माणया ज्या न्ह्याके

छिगु चुनावी एजेन्डा छु ?
— येँ मनपा १५ वडाय् आवागम, पूर्वाधार विकास यायेगु, सम्पदा संरक्षणलिसें जनस्वास्थ्यय् बः बीगु खः । अथे हे विष्णुमति खुसि सिथय् हराभरा यानाः वडाया तब्यागु लँपुइ शहरीकरण यानाः सिमा पीगु, सामाजिक सेवा व सुशासनय् बः बीगु जुइ । नेपालभाषालिसें देय्या मेमेगु भाय्या संरक्षणय् तिबः बीगु व वडावासीया समस्या इपिंनाप हे सहलह यानाः समाधानया निंतिं कुतः याये ।

छिगु वडाया समस्यात छु छु खः ?
— मुख्य समस्या ला त्वनेगु लः हे खः । गनं गनं धःया नं समस्या दुसा लँय् ल्वहंतं सीगु, सतक पीच यायेगु, पर्ति जग्गाया संरक्षण यायेमाःगु दु । त्वाः त्वालय् बर्खाया लः मुना च्वनीगु नं समस्या दुसा शान्ति सुरक्षा व सतक मतया व्यवस्था यायेमाःगु खनेदु ।

निर्वाचित जुइ धइगु आधार छु दु ?
— जि सामाजिक व्यक्ति । समाजसेवा, विकास निर्माण व सम्पदापे्रमी नं । अले भाषाह्यःमिलिसें सांगीतिक, सांस्कृतिक, धार्मिक ख्यःया नापनापं कलाकारिता ख्यलय् नं सक्रिय जुयाच्वनाम्ह । थ्व सकतां ख्यलय् जि उतिकं लोकंह्वानाच्वनागु दु । थुपिं ख्यलय् जिगु क्रियाशीलता व लोकप्रियतां हे जि निर्वाचित जुइ धइगु जितः पूर्ण विश्वास दु ।

निर्वाचित जुयादिल धाःसा दकलय् न्हापां छु ज्या यानादी ?
— निर्वाचित जुल धाःसा दकलय् न्हापां विश्वसम्पदाया धलखय् लानाच्वंगु झी बौद्धतय् आस्थाया केन्द्र स्वयम्भू महाचैत्यपाखें विकासया ज्या न्ह्याके । थुकिया लागि जिगु व्यक्तिगत रुपं व वडापाखें नं पहल यायेगु जुइ । अनंलि वडावासनाप सहलह यानाः वडाया मू मू समस्या समाधानया ज्या न्ह्याके ।

स्थानीय भाषा, कला, संस्कृतिया उत्थानया निंतिं छिगु योजना ?
— स्थानीय भाषा, कला, संस्कृतिया उत्थान यायेगु ज्याय् जि थौं म्हिगः जक मखु सनाच्वनागु मखु । १३, १४ दँ निसें थौं ५५ दँया उमेरय् तकं मदिक्क पलाः न्ह्याका वयाच्वनागु दु । थ्व सकसिनं खना वयाच्वंगु व सकसिनं सिउगु, स्वया वयाच्वंगु हे खँ खः । निर्वाचित जूसा जक थ्व ख्यःया निंतिं ज्या यायेगु मखुसा मयायेगु खँ जुइमखु । जिं निपलाः छी फत्तले व सासः ल्हाये फत्तले दिपाः मकासे थःगु थासं सक्रिय रुपं न्ह्याना हे च्वनेगु जुइ । थुकी शंका याये म्वाः ।

सम्बन्धित बुखँ

LEAVE YOUR COMMENTS