मिस्तय्त आत्मरक्षा तालिम
पुरुषप्रधान समाजय् मिस्तय्त जुइगु हिंसायात निरुत्साहित यायेगु ताः तयाः मिस्तय्त चेतनामूलक आत्मरक्षा सम्बन्धी प्राविधिक तालिम बिउगु दु । न्हापांगु पलाः नेवाः मिसा पुचः पाखें थनया शान्ति निकुञ्ज स्कलय् निन्हुयंकं थ्व तालिम संचालन यानाः नीन्याम्हेसित आत्मरक्षा तालिम बिउगु खः ।
मरुत्वाःया ७३ दँया ईश्वरी महर्जनं नं उगु तालिम कयादीगु खः । वय्कःया सहभागितां मेपिं सहभागीपिंत नं उत्साह ब्वलंगु खः । ‘आत्मरक्षा तामिलाय निंतिं १४ निसें ३५ दँया मिस्तय्त आह्वान यानागु खः, तर ७३ दँया अजिं नं ब्वति कयादिल, थुकिं मेपिंत नं थप उत्साह ब्वलन’ पुचःया अध्यक्ष शिला साय्मिं कनादिल ।
तालिमय् ब्वति काःपिंत प्रशिक्षकपिं पद्मा खयरगोली, जयन्ती श्रेष्ठ, रोजिना लोहनी, रविन्द्र श्रेष्ठं हिंसा विरुद्धया आत्मरक्षा तालिम बियादीगु खः । तामिलय् आकस्मिक रुपं सुनां आक्रमण यात धाःसा वा सार्वजनिक थासय् हिंसा यायेत स्वल धाःसा गुकथं प्रतिकार यायेगु धयागु स्यंगु खः । थज्याःगु तालिमं आपराधिक मानकसिता दुपिं मिजंतय्त निरुत्साहित याइगु विश्वास यानातःगु दु ।
मिस्तय्त जुइगु हिंसाया समाचार थौंकन्हय् न्हियान्हिथं धयाथें पत्रपत्रिकाय् खबर वयाच्वंगु दु । गुलिखे थासय् मिस्तय्त थः हे भाःतपाखें च्याकेगु तकं जुयाच्वंगु दु । मिस्तय्त जुइगु हिंसाय् दायेगु जक मखु मानसिक व यौनिक यातना, दुव्र्यवहार नंलाः ।मिस्तय्विरुद्ध हिंसा शहरय् स्वयां गामय् अप्वः जुइगु अध्ययनं क्यनाच्वंगु दु ।
पेशाया ल्याखं स्वयेबलय् छेँज्या याइपिं ज्यामि मिस्तय् अप्वः थज्याःगु हिंसां प्रताडित जुयाच्वंगु दु । सामाजिक परम्पराया कारणं नं दकलय् अप्वः मिस्त हिंसा शिकार जुयाच्वंगु दु ।छगू अध्ययन कथं संसारन्यंकंया स्वम्ह मध्ये छम्ह मिसां थःगु जीवनकालय् छुं न छुं कथंया हिंसा फयेमालाच्वंगु दु व अज्याःगु हिंसा अप्वः थें वया हे सतिक लाःपिं प्रेमी, विश्वासपात्र वा जीवनपासा पाखें फयेमालाच्वंगु दु ।
अथेहे संसारन्यंकंया ३५ प्रतिशत मिस्तय्सं थःगु जीवनकालय् छुं नं छुं कथं शारीरिक वा यौनजन्य हिंसाया शिकार जूगु तथ्यांकं क्यनाच्वंगु दु ।मिजंतय् पाखें गुबलें गुबलें चायेकं मचायेकं मिस्तय् संवेदनाय् घाः लाइकथं हिंसाजन्य ज्या जुयाच्वंगु दु । मिस्तय्त जुइगु हिंसाया क्रियाकलापया तब्यागु दायरा अन्तर्गत मिस्तय् स्वीकृति बिना उमित असहज जुइकथं अश्लिल खँ न्यंकेगुयात नं यौनजन्य हिंसा खः ।
LEAVE YOUR COMMENTS