नेपालभाषा ब्वंकीपिं शिक्षक माग
येँ -येँ महा–नगरपालिकां ब्वंकेत्यंगु नेपालभाषाया पाठ्यक्रम ब्वंकेगु लागिं शिक्षक माग याःगु दु । म्हिगः राष्ट्रिय न्हिपौ गोरखापत्रय् विज्ञापन प्रकाशित यासें नेपालभाषा ब्वंकीपिं १७२ म्ह शिक्षक माग याःगु खः ।
येँ महानगरपालिका अन्तर्गत लाःगु फुक्क हे निजी व सार्वजनिक स्कुलय् येँ मनपां थुगुसी कक्षा १ निसें ८ तक नेपालभाषाया माध्यमं ‘येँ देय् म्हसीके’ नामं पाठ्यक्रम ब्वंकेगु निर्णय यायेधुंकूगु दु । उकिया लागिं स्थानीय पाठ्यसफू समेत छापे जुइधुंकूगु दु ।
उगु पाठ्यसफू ब्वंकेगु लागिं शिक्षकया व्यवस्था नं येँ मनपां हे यायेत्यंगु खः । उकिया लागिं थ्व सुचं सार्वजनिक याःगु खः । येँ महानगरपालिका दुने लाःगु फुक्कं सामुदायिक स्कुलय् येँ मनपां हे शिक्षक छ्वयेगु निर्णय मनपां याःगु खः । निजी स्कुलय् धाःसा स्कुल थःपिंसं हे शिक्षकया व्यवस्था यायेमाः धाःगु दु ।
सुचनय् धयातः कथं थ्व पाठ्यक्रम ब्वंकेगु लागिं नेपालभाषां खँ ल्हाये सःपिं, च्वये ब्वने सःपिं शिक्षक कायेगु ग्वसाः येँ मनपां तयातःगु दु । नापं नेपालभाषा हे विषय कयाः ब्वनातःपिं व नेपालभाषां ब्वंकेगु अनुभव दुपिंत उमेरया हदबन्दी मतयेगु खँ समेत सुचनय् धयातःगु दु ।
येँ मनपां नेपालभाषाया माध्यमं स्थानीय पाठ्यक्रम ब्वंकेगु निर्णय यायेवं न्हापा नेपालभाषा ब्वंकेगु चलन मदुगु सामुदायिक स्कुलतय्सं नं नेपालभाषा ब्वंकेगु शुरु याना हःगु दु । अथे हे गुलिखे निजी स्कुलतय्सं नं नेपालभाषा ब्वंकेगु शुरु याःगु दु ।
येँ मनपां थ्व निर्णय यायेवं स्वनिगःया किपू नपा, भ्वँत नपा लगायत थीथी नपातय्सं नं नेपालभाषा ब्वंकेगु निर्णय याना हःगु दु ।
LEAVE YOUR COMMENTS