जयराम त्वायना मिस्टर भक्तपुर

थिमि – प्यक्वःगु मिस्टर भक्तपुर २०७६ व न्हापांगु मिसा एथलेटिक्स फिजिक्सया उपाधी छसिकथं जयराम त्वायना व सनम मुलगुठीं त्याकूगु दु । ७० प्लस किलो तौल समुहपाखें प्रतिस्पर्धा याःम्ह त्वायनानं ४३ म्ह प्रतियोगितय्त लिउने लाकाः मिस्टर भक्तपुर उपाधी त्याकूगु खः । अथेहे मुलगुठीं च्याम्ह मिसापिं प्रतियोगिपिंत लिउने लाकूगु खः ।

भक्तपुर जिल्ला शारीरिक सुगठन तथा फिटनेस संघया ग्वाहालिय् थिमिइ जूगु धेंधेंबल्लाःया उपाधी त्याकादीम्ह त्वायनायात मध्यपुर थिमि नगरपालिकाया प्रमुख मदनसुन्दर श्रेष्ठं प्रमाणपत्र, शिल्ड, मेडल व ब्यानेट लःल्हानादिल । अथेहे महिला एथलेटिक्स फिजिक्स त्याकादीम्ह मुलगुठीयात नगरपालिकाया उपप्रमुख अञ्जनादेवी मधिकर्मीं सिरपाः लःल्हानादिल ।

शारीरिक सुगठन धेंधेंबल्लाःया थीथी विधाय् उपाधी त्याकादीपिंत निक भुजीकिक व शिवशिखर कृषि सहकारीं प्रोत्साहन कथं नगद सिरपाः नं बिउगु खः । यचु पार्टी भेन्युया हलय् जूगु धेंधेंबल्लाखय् अमितकुमार मण्डल निगूगु थासय्, रामचन्द्र स्वंगूगु थासय्, नितेश श्रेष्ठ प्यंगूगु थासय्, विवेक अवाल न्यागूगु थासय् लाःगु खः ।

५५ किलो निसें ७० किलो च्वय्या तौलया न्यागू समूह दयेकाः हरेक समूह पाखें छम्ह छम्ह उत्कृष्ट बडि बिल्डर ल्यःगु खः । ज्याझ्वलय् न्ववानादिसें संघया अध्यक्ष बाबुकाजी मानन्धरं भक्तपुर जिल्ला शारीरिक सुगठन तथा फिटनेश संघं थ्वयां न्ह्यव स्वक्वः तक जिल्लास्तरीय धेंधेंबल्लाः यायेधुनागु खँ कनादिल ।

२०५२ सालय् स्वास्थ्यया निंतिं खेलकूद, राष्ट्रया निंतिं खेलकूद धयागु नारा बियाः संघया स्थापना जूगु खः । ज्याझ्वलय् जिल्लापाखें अन्तर्राष्ट्रिय प्रतियोगिता त्याकूपिं कासामिपिंत सम्मान यासें निर्णायकया कोर्स पूवंकपिं व पदोन्नति जूपिं कासामिपिंत प्रमाणपत्र नं लःल्हाःगु खः । ज्याझ्वःया संचालन संचारकःमि केके मानन्धर व ज्ञानेन्द्र मानन्धरं मंकाः कथं याःगु खः ।