संवैधानिक परिषद्ं नियुक्ती सिफारिस याःगु नां सभामुखं लितछ्वल

येँ – संवैधानिक परिषद्ं थीथी आयोगय् नियुक्ती याःनिंतिं सिफारिस याःगु नांयात सभामुख अग्नि सापकोटां लित छ्वयाबिउगु दु । संवैधानिक परिषद्ं नियुक्त सिफारिस यायेधुंकाः संसदीय समितिइ अनुमोदन यायेगु निंतिं थुपिं नां संसदय् छ्वया हयातःगु खः । सभामुख सापकोटां थ्व नां सिफारिसया वैधानिकताय् हे न्ह्यसः थँसें नां परिषद्य् छुं लित छ्वयाबिउगु खः ।

प्रधानमन्त्री केपी ओलीं अध्यादेश पाखें संवैधानिक परिषद्या ऐनय् हे हिउपाः हयाः थ्व नियुक्तिया नां सिफारिस याःगु खः । संवैधानिक परिषद्या बैठकय् प्रमुख प्रतिपक्षी नेता शेर बहादुर देउवा व सभामुख अग्नि सापकोटा उपस्थित मजुइवं प्रधानमन्त्रं ओलीं अध्यादेश मार्फत परिषद्या गणपुरक संख्यां निर्णय यायेफइ कथं संवैधानिक परिषद्या ऐन हे संशोधन यानाबिउगु खः । संशोधित ऐन कथं प्रधानमन्त्री ओली, प्रधानन्यायाधीश चोलेन्द्र शम्शेर जबरा व राष्ट्रिय सभाया अध्यक्ष गणेश तिम्लिसिना जक च्वनाः थीथी आयोगय् नियुक्त जुइपिं पदाधिकारीतय् नां सिफारिस याःगु खः ।

थथे सिफारिस याःपिनि संसदीय समितिइ सुनुवाइ लिपा जक नियुक्त यायेदइगु जूगुलिं सुनुवाईया निंतिं उमिगु नां संसदय् छ्वया हयातःगु खः । सभामुख सापकोटां सुनुवाइ यायेमफइगु कारण च्यागू बुँदाय् न्ह्यथँसें थ्व सिफारिस यानाहःपिनि नां परिषद्य् हे लित छ्वयाबिउगु खः ।

सभामुखं नां लित छ्वयेगु झ्वलय् च्वःगु पतिइ सुनुवाइ यायेफइगु अवस्था मदुगुलिं सिफारिस यानाहःगु सककल हे भ्वँ सहित लित छ्वया हया धकाः च्वयाछ्वःगु दु । थुकिया लिसें सुनुवाइ यायेमफइगु कारण धकाः न्ह्यथँगु च्यागू बुँदा मध्ये छगू बुँदाय् थ्व नियुक्ति प्रक्रिया हे वैधानिक मजूगु खँ न्ह्यथनातःगु दु । बुँदाया स्वंगूगु ल्याखय् धयातःगु दु, ‘पौष ३० गते सुथय् ९ बजे परिषद्या बैठकया निंतिं गणपुरक संख्या मदयेवं उकुन्हु हे न्हिनय् अध्यादेश हयाः सनिलय् ५ बजे बैठक च्वनाः याःगु निर्णय सैवैधानिक, संवैधानिक परिषद् ऐन व सर्वोच्च अदालतपाखें प्रतिपादीत सिद्धान्त विपरीत दु ।’ थुकी सरकारं अध्यादेश हे गैरसंवैधानिक ढंगं हःगु धकाः तकं धयातःगु दु ।

सभामुख सापकोटां अध्यादेश हयेधुंकाःया बैठक बारे थःत जानकारी तकं मबिउगु खँ नं पतिइ न्ह्यथनादीगु दु । नां लित छ्वयेगु झ्वलय् सभामुख सापकोटां न्हापा न्हापा नं थथे नियुक्ती जूगु नां लितछ्वयेगु ज्या जूगु उदाहरण नं पतिइ न्ह्यथनादीगु दु ।

स्वतः नियुक्त जुइ ला ?
संवैधानिक परिषद्ं आयोगय् नियुक्तिया निंतिं सिफारिस याःगु नां संसदीय समितिइ सुनुवाइ यायेमाः । तर थथे सुनुवाइया झ्वलय् ४५ न्हु तकया दुने नं समितिं थःपिनि निर्णय मबिल धाःसा स्वत्तः नियुक्त जूवनीगु प्रावधान दु ।

आः विवादीत नियुक्तीया खँय् परिषद्ं नां सिफारिस याःगु माघ २० गते मंगलवाः ४५ न्हु थ्यनेत्यंगु दु । प्रधानमन्त्री ओली पक्षीय संविधानविद्तय्सं समितिं निर्णय मबिउगु ४५ न्हु दयेवं परिषद्ं सिफारिस याःपिं स्वतः नियुक्त जुइगु खँ धयाच्वंगु दु । मेखे गुलिखे संविधानविद्तय्सं धाःसा परिषद्ं नां सिफारिस याःसां ४५ न्हु पूवनेवं स्वतः नियुक्त जुइफइमखु धयाच्वंगु दु । उमिगु तर्क कथं संसदीय समितिं सुनुवाई सुरु यानाः ४५ न्हुया दुने निर्णय बीमफुगु खःसा जक स्वतः नियुक्त जुइगु खः, तर सुनुवाई हे सुरु मजूनिगु अवस्थाय् स्वतः नियुक्त जुइफइमखु ।

संसदीय समितिं सुनुवाइ याये न्ह्यः हे प्रधानमन्त्रीं संसद हे विघटन यानाबीवं सुनुवाइ सुरु तकं जुइमफुगु खः ।