बुँ हे म्वायेक तरकारी सयेकेगु प्रविधि

येँ-चा व लः मदुगु थासय् नं तरकारी सयेकेगु लागिं विकास याःगु ‘हाइड्रोपोनिक’ कृषि प्रविधि नेपालय् नं परीक्षण कथं शुरु याःगु दु । चा स्वयां नं अप्वः मरुभूमिया फि जक दइगु खाडी मुलुक कतारं लिहां वःम्ह छम्ह नेपाःमिं पर्वत जिल्लाय् थ्व प्रविधिं तरकारी सयेकेगु ज्या याःगु खः । लः, फय् व निभाः फुक्कं माक्व माक्व जक बियाः तरकारी सयेकेगु न्हूगु प्रविधियात ‘हाइड्रोपोनिक फार्मिङ’ धाइ । थ्व प्रविधिं तरकारी सयेकेगु लागिं चा हे म्वाः । चा जक मखु बुँ तक हे माः धइगु नं मदु । छकू हे थासय् नं थीथी तँ दयेकाः तरकारी पीगु ज्या थ्व प्रविधिपाखें याये जिउ ।

कतारं लिहां वःम्ह पर्वत जिल्लाया स्थानीय कृषक लालबहादुर हरिजनं अनया कुशमा नगरपालिका अम्बोड धाःगु थासय् थ्व प्रविधिं तरकारी पीगु ज्या याःगु खः । वय्कलं तँ तँ दयेकातःगु क्यारिजय् पाइपं लः छ्वयाः तरकारी सयेकादीगु खः ।
वय्कलं कनादी कथं आःया नीछगूगु शताब्दीया कृषि धइगु आः थ्वहे जुइ । थौंकन्हय् धमाधम जग्गा मदया वनाच्वंगु दु । लःया समस्या झन् झन् विकराल जुजुं वयाच्वंगु दु । थज्याःगु अवस्थाय् नं कृषि ज्या यायेगु खःसा आः हाइड्रोपोनिक विधि हे छ्यलेमाः ।

थ्व विधिपाखें लैं, गाजर, गोलभेंडा लिसें थीथी कथंया वाउँचा सयेके जिउ । जःलाखःला देय् भारतय् थ्व प्रविधिं तरकारी सयेकाः व्यवसाय याइपिं तकं पिहां वयेधुंकल । नेपालय् धाःसा थुकिया परीक्षण तिनि जुयाच्वंगु दु । ल्याय्म्हम्ह कृषक हरिजनं कतारय् छक्वः चाःहिउ वनाबलय् थ्व प्रविधिं तरकारी सयेकातःगु खनाः थम्हं नं नेपालय् थुकिया प्रयोग याना स्वयागु खँ कनादिल । नेपाःया कृषि सम्बन्धी छुं नं सरकारी निकायं धाःसा आः तक थुकिया बारे बिचाः याःगु तकं खने मदुनि ।