भारतं चुनावय् वंसां जिउ धइगु सन्देश बिउगु दु

येँ (नेपालभाषा टाइम्स) – जःलाखःला देय् भारतं नेपालय् संसद विघटन लिपा चुनाव हे जुइमाःगु सन्देश बिउगु खँ सीदुगु दु । परराष्ट्रमन्त्री प्रदीप ज्ञवाली भारतया भ्रमण वनाच्वंगु दुसा अन जूगु उच्चस्तरीय बैठकय् नेपालय् खनेदुगु राजनीतिक संक्रमण बारे भारत प्रधानमन्त्री केपी ओलीया हे पक्षय् दुगु सन्देश परराष्ट्रमन्त्रीयात भारतीय संस्थापन पक्षं बिउगु दु ।

परराष्ट्रमन्त्रीयात उल्लेख यासें सूत्रं धाःगु दु, ओली सरकारं छु निर्णय याइ, उकिया पक्षय् भारत दु, भारतं संसद विघटनया बारे सर्वोच्च अदालतय् विचाराधीन जुयाच्वंगु खःसां नं तत्कालया एजेन्डा धइगु निर्वाचन हे जूगु बिचाः प्वंकूगु दु । मन्त्री ज्ञवालीया भारत भ्रमणं नेपाः-भारत दथुइ दुगु तनाव म्हो जूगु व वार्ताया लुखा चाःगु विश्लेषण नं भारतं याःगु दु । नेपाः-भारत बारे जानकार एसडी मुनीं परराष्ट्रमन्त्री ज्ञवालीया भ्रमणं छुं विषयसं सम्झौता मयाःसां नं निगू देय् दथुइ दुगु तनाव म्हो यायेत भूमिका म्हितूगु खँ धयादीगु दु ।

एसडी मुनीं धयादी, ‘थ्व स्वयां न्ह्यः भारतपाखें जूगु उच्चस्तरीय नेपाल भ्रमण व आः परराष्ट्र मन्त्री ज्ञवालीया भारत भ्रमणं निगू देय् दथुइ दुगु असमझदारीयात म्हो याइ, लिसें भारतया संस्थापन पक्ष नेपाल सरकारया पक्षय् दुगु खँ प्रष्ट याइ ।’ वय्कलं भारतं नेपालय् चुनाव चाहे जूगु स्पष्ट सन्देश बिउगु खँ कनादिसें धयादी, ‘मन्त्री ज्ञवालीं भारतया भ्रमण यानादीगु दु, उगु भ्रमणं छगू सन्देश बिउगु स्पष्ट दु कि भारतं नेपालय् चुनाव चाहे जूगु दु ।’

नेपालय् खनेदुगु आःया राजनीतिक संक्रमणय् भारतया छुं कथंया ल्हाः मदुगु व दये नं मजिउ धासें राजनीतिक विश्लेषक मुनीं नेपाल सरकारं छु निर्णय याइ उकी भारतया समर्थन दुगु खँ नं धयादीगु दु । नेपालय् प्रमं याःगु संसद विघटन गलत जुल धकाः चीनं अप्रत्यक्ष रुपं धायेगु यानाच्वंगु दुसा भारतं धाःसा सांकेतिक रुपं संसद विघटनयात समर्थन यानाच्वंगु दु ।

संसद विघटन न्ह्यः भारतया थीथी पुचलं नेपाःया भ्रमण याःगु खःसां वयां लिपा चिनियाँ विदेश मन्त्रीस्तरीय भ्रमण जूगु खः । थ्वयां लिपा हे संसद विघटन याःगुलिं भारतं तिबः बिउगु विश्वास नेपाःया राजनीतिक दलतय्सं याना वयाच्वंगु दु। तर भारतं धाःसा नेपाःया आन्तरिक मामिलाय् छुं नं कथंया हस्तक्षेप मयानागु दावी याना वयाच्वंगु दु ।

सम्बन्धित बुखँ

LEAVE YOUR COMMENTS