नेपालं भारतयाके फ्वनाः खोप मकाइगु

येँ (नेपालभाषा टाइम्स) – कोरोना विरुद्ध खोपया निंतिं नेपालं भारतयाके ग्वाहालि मफ्वनीगु जूगु दु। स्वास्थ्य तथा जनसंख्या मन्त्री हृदयेश त्रिपाठीं न्हापांगु चरणया खोप न्यायेगु निंतिं ध्यबाया व्यवस्था जुइधुंकूगुलिं भारतयाके ग्वाहालि मकायेगु खँ धयादीगु खः ।

वय्कलं बिबिसीलिसे खँ ल्हासें अर्थ मन्त्रालयं खोपया निंतिं ४८ अर्ब ध्यबा फ्यायेधुंकूगु जानकारी बियादिल । तर स्वास्थ्य मन्त्रालयं हे थ्वयां न्ह्यः खोप न्यायेगु निंतिं खोप कोषय् योगदान यायेत सार्वजनिक आह्वान हे याःगु खः। खोप न्यायेत सार्वजनिक आह्वान यानाः ध्यबा फ्वन धकाः सरकारया आलोचना नं जुयाच्वंगु खः । मन्त्री त्रिपाठीं धाःसा सरकारं ध्यबाया व्यवस्था यायेधुनागु जूसां गुलिखे संस्थातय्सं ध्यबा बीगु इच्छा क्यनाच्वंगुलिं जक थज्याःगु सुचं पिकायेमाःगु खँ धयादीगु दु । वय्कलं खोप न्यायेत ग्वाहालि वइगु ध्यबा एकद्वार प्रणालीं वयेमाः धकाः जक थ्व सुचं पिकायेमाःगु स्पष्टीकरण नं बियादीगु दु ।

सरकारं नेपाःया ७२ प्रतिशत जनसंख्यायात खोप बीगु योजना दयेकाच्वंगु दु । १४ दँ स्वयां क्वय्यापिं व प्वाथय् दुपि मिस्तय्त थ्व खोप बी मजिउ । अथेहे थ्व खोप स्वेच्छिक जुइगु, सुयातं जबर्जस्ती खोप मबीगु खँ नं मन्त्री त्रिपाठीं धयादीगु दु। खोप बीमाःपिं ७२ प्रतिशत जनसंख्या मध्ये २० प्रतिशत खोप कोभ्याक्स सुविधा अन्तर्गत नेपाःयात वइ । न्हापांगु चरणय् वइगु थ्व खोपया ३ प्रतिशत अग्रपंक्तिइ ज्या यानाच्वंपिं स्वास्थ्यकर्मी व सुरक्षाकर्मीतय्त बीसा १७ प्रतिशत खोप ५५ दँ स्वयां च्वय् यापिंत बीगु खँ धाःगु दु ।