ओली ‘अध्यक्ष’ धाःगुलिं आपत्ति, निर्वाचन आयोगयात दाहाल-नेपाल पुचःया न्ह्यसः

येँ (नेपालभाषा टाइम्स) – निर्वाचन आयोगं प्रधानमन्त्री केपी ओलीयात च्वःगु पतिइ वय्कःयात ‘अध्यक्ष’ धकाः सम्बोधन याःगु खँय् दाहाल-नेपाल पुचलं आपत्ति प्वंकूगु दु। पार्टी विवाद बारे निर्वाचन आयोगं छ्वया हःगु पौया लिसः बीत निर्वाचन आयोग वंगु दाहाल-नेपाल पुचलं थ्व आपत्ति प्वंकूगु खः ।

ओलीयात अध्यक्ष सम्बोधन यानाः निर्वाचन आयोगं पौ च्वयेगु उचित मजू धासें पार्टीया विधानकथं कन्द्रीय दुजःया दुई तिहाइ बहुमतं ओलीयात अध्यक्ष पदं चीकेधुंकूगु कारणं आः वय्कःयात अध्यक्ष धाये मजिउगु दावी नेकपाया केन्द्रीय दुजः लिलामणि पोखरेलं कनादीगु खः । पोखरेलं धयादिल, ‘पार्टी विधान कथं ओलीयात कारबाही यायेधुन, अध्यक्षं चीके धुन, तर छिकपिसं लिबाकाच्वंगुलिं शंका ब्वलंगु दु। जिमिसं शंका मयाना, जनतां शंका याइ ।’

वंगु पुस २३ गते निर्वाचन आयोगं थःपिंत च्वयाहःगु पौयात कयाः न्ह्यसः तसें धयादिल, ‘प्रमुख आयुक्त थपलियां कानुनं छु धाइ, वहे कथं ज्या यायेगु धकाः लिसः बिउगु दु, लिसें प्रमुख आयुक्तं निगुलिं पक्षया विवरण अध्यावधिक यायेगु निंतिं जक पौ च्वयागु खःसां आधिकारिताया
प्रक्रियाय् दुहां वने मफुगु खँ धाःगु दु ।’

म्हिगः अध्यक्षद्वय् माधव नेपाल व पुष्पकमल दाहाल, राजेन्द्र पाण्डे, लिलामिण पोखरेल, रामनारायण विडारी व कृष्णभक्त पोखरेल लिखित पौ ज्वनाः निर्वाचन आयोग वंगु खः । निर्वाचनय् आयोगया आयुक्त दिनेश थपलियायात अध्यक्ष नेपालं न्ह्यसः न्यँसें धयादिल, ‘छिकपिंसं छु आधारय् ओली पक्षं लःल्हाःगु भ्वंयात सहज रुपं कयादिया ? पार्टी विधानं १० प्रतिशत स्वयां अप्वः मनोनयन याये मदइगु व्यवस्था यानातःगु दु, तर ११९९ म्ह दुजः केन्द्रीय दुजः दयेकूगु विवरण गुकथं कयादिया ?’

लिसें वय्कःपिंसं दल सम्बन्धी ऐनया ४४ (१) कथं दलया वैधानिकता दाबी यायेत वा धकाः पौ छाय् च्वयागु धकाः नं न्ह्यसः न्यंगु खः । लिसलय्आ युक्त थपलियां कानुन कथं प्रक्रिया न्ह्यःने न्ह्याकूगु लिसः बिउगु खः । वंगु पुस १७ गते निर्वाचन आयोगं प्रचण्ड-नेपाल पुचःयात केन्द्रीय कमिटीया ४० प्रतिशत दुगु दावी यायेत न्हय्न्हुया म्याद बियाः पौ च्वःगु खःसा ओलीयात धाःसा जानकारी पौ जक छ्वःगु खः । आयोगया थुगु शैली नं कानुन अःखः जूगु खँ आयुक्त थपलियायात नेतातय्सं धाःगु दु ।

आयोगय् यदि सुं वनाः दलया वैधानिकता दावी यात धाःसा जक थज्याःगु पौ छ्वयेगु खः । तर जिमित छाय् पौ च्वया धकाः न्ह्यसः न्यंगु खँ नेतां पोखरेल कनादीगु दु । म्हिगः दाहाल-नेपाल पक्षं निर्वाचनया प्रक्रिया दिकेत नं लिखित निवेदन बिउगु दु। संसद विघटन असंवैधानिक जूगु दावी यासें लानाच्वंगु मुद्दा सर्वोच्च अदालतय् विचाराधीन जुयाच्वंगुलिं निर्वाचनं प्रक्रिया न्ह्याके मजिउ धइगु नं नेकपाया माग दु ।

सम्बन्धित बुखँ

LEAVE YOUR COMMENTS