२० दँ पुलांगु सार्वजनिक गाडी जफत
येँ – सरकारं २० दँ पुलांगु गाडी सम्बन्धय् अनुगमन यानाः ग्वीप्यंगः सार्वजनिक सवारी जफत याःगु दु । यातायात व्यवस्था विभागं २० पुलांगु गाडी सतकय् अनुगमन यानाः जफत याःगु खः । वंगु चैत १ गतेनिसें २० दँ पुलांगु गाडी चले याके मबीगु योजनाकथं अंचल यातायात व्यवस्था ज्याकुथिं देय्या झिंप्यंगुलिं अंचलया सतकय् अनुगमन यानाः उकथं जफत याःगु खः ।
सरकारं वातावरण प्रदूषण नापं सवारी दुर्घटना अप्वःगु धासें उकथंया योजना लागू याःगु खः । थुगु योजना अन्तर्गत सवारी तथा यातायात व्यवस्था नियमावली संशोधन यानाः चैत १ गते निसें २० दँ पुलांगु सवारी संचालनय् प्रतिबन्ध तःगु खः ।
प्रतिबन्धया बावजुद नं सतकय् चले जुयाच्वंगु अज्याःगु सवारी साधनयात सरकारं जफत याःगु खः । विभागं फागुन मसान्ततकया दुने २० दँ पुलांगु सवारी साधन पत्रुया निंतिं धासें निवेदन बीत सम्बन्धित व्यवसायीतय्त सुचं नं बिउगु खः ।
सरकारं बिउगु अवधि दुने मुक्कं १२७ गः सवारी साधनं पत्रु यायेत झिंप्यंगुलिं अंचल ज्याकूपाखें विभाजय् निवेदन दुहां वःगु विभागया महानिर्देशक रुपनारायण भट्टराई नं कनादीगु दु । विभागया तथ्यांककथं २० दँ पुलांगु अज्याःगु सवारी साधन देय्न्यंकं १६,९६१ दु । सरकारं वाउँगु प्लेट, मिटर ट्याक्सी व मेमेगु सार्वजनिक यातायात सवारीयात २० पुलांगु नियम लागू याःगु खः । निजी व सरकारी नम्बर प्लेटया २० दँ पुलांगु सवारीयात नं चिइकेमाः धइगु सरोकारवालाया धापू दु । वातावरण प्रदूषण व दुर्घटना म्हो यायेगु खःसा २० दँ पुलांगु सवारी साधन क्षेत्र विरुद्ध सशक्त रुपं सः ल्ह्वना वयाच्वनादीम्ह रामबहादुर थापां निजी व सरकारी नम्बर प्लेटया सवारी साधन नं चिइकेमाः धयादीगु दु ।२० दँ पुलांगु दक्वं सवारी साधन नं चले यायेगु बन्द यायेगु खःसा वातावरण प्रदूषणय् गाक्कं म्हो वइगु वय्कःया दावी दु ।
LEAVE YOUR COMMENTS