स्वनिगःया ट्राफिक व्यवस्थापन व यातायात सुधारय् गृहमन्त्री

स्वनिगःया ट्राफिक व्यवस्थापनलिसें सतक यातायात क्षेत्रय् सुधार हयेगु निंतिं सरकारया हे छम्ह मन्त्री स्वयम लगे जुयादीगु दु । गृहमन्त्री रामबहादुर थापां ट्राफिक व्यवस्थापनलिसें सतक यातायातया क्षेत्रय् सुधार हयेगु विषययात प्राथमिकताय् तयाः ज्या न्ह्याकादीगु खः । ‘ट्राफिक जाममुक्त नेपाल’ सम्भव दुगु धासें गृहमन्त्री थापां थःगु ध्यान थुखेपाखे केन्द्रीत यानादीगु खः । वय्कलं गृह मन्त्रालयया पदभार ग्रहण यानादीगु लगत्तै हे थ्व विषयय् केन्द्रीत जुयाः वंगु छवाःया दुने स्वंगू बैठकया नं आह्वानादीधुंकूगु दु । थ्व विषयय् भौतिक पूर्वाधार तथा यातायात मन्त्रालयया सचिव, यातायात व्यवस्था विभागया महानिर्देशक, सडक विभागया महानिर्देशक, महानगरीय ट्राफिक प्रहरी महाशाखा प्रमुख लगायतया सरोकारवाला दथुइ न्हापांगु बैठक वंगु फागुन २९ गते च्वंगु खः ।

बैठकं गृहमन्त्री थापाया अध्यक्षताय् गृ, सूचना व संचार, अर्थ, भौतिक पूर्वाधार व यातायात, उर्जा, जलस्रोत व सिँचाइ मन्त्रालयया सचिव, सार्वजनिक खरिद अनुगमन ज्याकूया सचिव, प्रहरी महानिरीक्षक, येँ महानगरपालिका व यल महानगरपालिकाया प्रमुख लगायत दुजः दुगु निर्देशन व अनुगमन समिति गठन याःगु खः । वयां निन्हु लिपा हे चैत १ गते हाकनं मेगु बृहत बैठक गृहमन्त्रीया अध्यक्षताय् च्वन । गृह मन्त्रालयय् च्वंगु बैठकं ट्राफिक व्यवस्थापन यायेत व धू, कुँ चिइकेगु विषयय् येँ महानगरपालिका, यल महानगरपालिका, ख्वप नगरपालिकाया प्रमुख, नेपाल प्रहरी, सशस्त्र प्रहरी बल, राष्ट्रिय अनुसन्धान विभागया प्रमुख नापं स्वंगुलिं जिल्लाया प्रमुख जिल्ला अधिकारी, स्वंगुलिं जिल्लाया प्रहरी प्रमुखयात नं सःतूगु खः । उगु बैठकय् उपस्थित सकलें अधिकारीं ट्राफिक व्यवस्थापनया थीथी उपायबारे बृहत रुपं चर्चा याःगु खः । उगु बैठकं स्वनिगः दुनेया ‘जेब्रा क्रसिङ’ दुगु थासय् तत्काल रंग पानाः चिं तयेगु, ततःग्वःगु सवारी साधन (मालवाहक गाडीया निंतिं चक्रपथ पिने पार्किङया व्यवस्था मिले यायेगु व उकिया प्रक्रिया सम्बन्धित महानगर व नगरपालिकां मिले यायेगु निर्णय याःगु खः ।

अथे हे चक्रपथ दुनेया ‘ड्राइभिंग सेन्टर’ व गाडी मर्मतया निंतिं चायेकातःगु ‘वर्कशप’यात चक्रपथ पिने यंकेगु निंतिं सम्बन्धित महानगरपालिका, नगरपालिका व ट्राफिक प्रहरीं नेतृत्व यायेगु, पर्यटकीय वसयात कान्तिपथं तत्काल चिइकेत येँ महानगरपालिका व ट्रापिक प्रहरीं समनवय यायेगु, स्वनिगलं पिहां वनीगु गाडीया बसपार्क सम्बन्धित महानगरपालिका, नगरपालिका व ट्राफिक प्रहरी मिले यायेगु बैठकं निर्णय यात । स्यंगु गाडीतय्सं सवारी आवागमनय् पंगः थनेगु ज्या अप्वया वनाच्वंगुलिं उकियात व्यवस्थित यायेत थीथी प्यंगू थासय् ‘¥याकर’या व्यवस्था यायेगु, टेलिफोन, इन्टरनेट व केबलया तार लाक्वपाक्व तयेगु प्रवृत्तियात निरुत्साहित यायेत सूचना व संचार मन्त्रालय व सम्बन्धित महानगरपालिका, नगरपालिकाया समन्वयय् व्यवस्थित यायेगु, सवारी चाप म्हो यायेत यात्रु गयेगु व क्वकायेगु जक यायेगु, पार्किङ यानाः सतकय् जाम याइपिंत तत्काल कारवाही प्रक्रिया न्ह्याकेगु लगायतया निर्णय बैठकं याःगु दु ।

ट्राफिक व्यवस्थापनया हे सन्दर्भय् जूगु सहलहया झ्वलय् वंगु चैत ४ गते नं गृहमन्त्री संयोजक दुगु निर्देशन तथा अनुगमन समितिया बैठक च्वन । गृहमन्त्रीया अध्यक्षताय् च्वंगु बैठकं न्हय्न्हुया दुने थःथःगु निकायया सुधार कार्ययोजनासहित आः मेगु बैठकय् उपस्थित जुइगु निर्णय याःगु खः । अथे हे गृह मन्त्रालयया सहसचिव संयोजक दुगु समन्वय समिति छगू नं गठन यायेगु निर्णय बैठकं याःगु दु । बैठकय् गृह, सूचना व संचार, भौतिक पूर्वाधार व यातायात, उर्जा, जलस्रोत व सिँचाइ मन्त्रालयया सचिव, सार्वजनिक खरिद अनुमगन ज्याकूया सचिव, अर्थ मन्त्रालयया प्रतिनिधि, प्रहरी महानिरीक्षक, येँ व यल महानगरपालिकाया प्रमुख लगायतया उपस्थिति दुगु खः ।

गृह मन्त्री थापां सतक, ताँ लगायतया भौतिक संरचना निर्माणय् ढिलासुस्ती जुयाच्वंगुया लिउने भ्रष्टाचार व अनियमितता स्वानाच्वंगु धासें उकिया नं छानविन यायेगु जुइ धयादीगु दु । म्हो जरिवाना जूगुलिं ट्राफिक नियम हाचां गायेगु घटना अप्वया वनाच्वंगु धइगु सरोकारवालातय् धापूयात संबोधन यायेत जरिवाना अप्वयेकेगुव कानुनयात अझ थप कडा याना यंकेगु उद्घोष गृहमन्त्री थापां यानादीगु दु ।