स्थानीय सरकारपाखें नेपाल संवत् छ्यलाबुला

येँ (नेपालभाषा टाइम्स) – नेपाःया राष्ट्रिय संवत् नेपाल संवत्यात सरकारी ज्याखँय् नं छ्यलेमाः धइगु थ्व संवत्या अभियन्तातय्सं थ्वयेका वयाच्वंगु छगू माग खः । थ्व मागयात देय्या संघीय सरकारं पूवंकेगु ज्या मयाःसां येँ देय्या स्थानीय सरकारं धाःसा थुकियात पूवंकाः क्यना बिउगु दु ।

येँ महानगरपालिकां घर जग्गा कर, बहाल कर आदि थेंज्याःगु कर असुली यायेधुंकाः सेवाग्राहीयात बीगु रसिदय् आः नेपाल संवत् नं उल्लेख यायेगु शुरु याःगु दु । मनपा अन्तर्गतया फुक्क हे वडा ज्याकूपाखें जारी याइगु छुं नं कथंया रसिद, बिल, मूल्यांकन फारामय् आः नेपाल संवत् नं उल्लेख याना हःगु खः ।

नेपाल संवत्या तिथि छगू धाःसा  रञ्जना लिपिं च्वयेगु याना हःगु दु । मनपाया कम्प्युटरय् नेपाल सवत्या थ्व तिथि स्वतः पिहां वइकथं शफ्टवेयर दयेकाः तयातःगु दु । थुकिं यानाः मनपाया कम्प्युटरं प्रिन्ट जुइगु छुं नं भ्वँतय् नेपाल संवत्या तिथि नं समावेश जुयाः पिहां वइ । थ्व स्वयां न्ह्यः येँ मनपाया मेयर भाजु विद्यासुन्दर शाक्यपाखें जारी जुइगु छुं नं सुचं, विज्ञप्ति वा वक्तव्यय् नेपाल संवत् नं उल्लेख यायेगु चलन जूगु खः । आः उकियात हे विस्तार यानाः मनपां सेवाग्राहीलिसे व्यवहार याइगु सरकारी भ्वँतय् नं नेपाल संवत्या तिथि छ्यलेगु शुरु याना हःगु खः ।

स्थानीय सरकारपाखें जूसां नेपाल संवत्यात सरकारी ज्याखँय् छ्यलेगु थ्व छगू न्हूगु व सकारात्मक पलाः जूगु खँ अभियन्तातय्सं धाःगु दु ।

सम्बन्धित बुखँ

LEAVE YOUR COMMENTS