‘देवकाटाया छेँ’ य् नं राजनीतिक पूर्वाग्रह !

येँ – खस नेपाली भाषाया महाकवि लक्ष्मीप्रसाद देवकोटां थःगु जन्मकालय् यक्वं दुःख सिया वन धाइ । थौं मदयेधुंकाः नं वय्कःया छेँयात सुरक्षित यायेगु विषयय् खस नेपाली भाय्या साहित्यकारतय् दथुइ विवाद ब्वलंगु दु । मैतीदेवीइ च्वंगु वय्कःया छेँ ‘कविकुञ्ज’ थुना छ्वत धकाः नेपाल प्रज्ञा प्रतिष्ठानया विरोध याना हःगु दुसा छथ्वः सम्पदाप्रेमि धाःपिंसं थुकिया विरुद्ध रिट समेत तया बिउगु दु ।

नेपाल प्रज्ञा प्रतिष्ठानं देवकोटाया थ्व पुलांगु छेँ थुनाः अन आः स्वयां नं पुलांगु स्वरुप वःगु छेँ दनाः देवकोटा सम्बन्धी म्युजियम चायेकेगु योजना न्ह्यःने हःगु दु । तर सम्पदाप्रेमि व साहित्यप्रेमितय्सं धाःसा आः दुगु छेँयात हे रेक्ट्रोफिटिङ याये जिउगु कारणं थ्व छेँ थुने म्वाःगु तर्क तयाच्वंगु दु ।

प्रज्ञा प्रतिष्ठानया कुलपति गंगाप्रसाद उप्रेतिं कनादी कथं छेँयात रेक्ट्रोफिटिङ यानाः बचे याये फइ ला धकाः सन् २०२० या जुलाइपाखे इन्जिनीयरिङ अध्ययन नं जूगु खः । तर इन्जिनीयरतय्सं अध्ययन लिपा छेँ तसकं क्षति जुइधुंकूगु कारणं रेक्ट्रोफिटिङ यानाः बचे याये फइ मखु, पूवंक हे थुनाः न्हूगु दयेकेमाः धकाः रिपोर्ट बिउगु कारणं उमिगु हे सल्लाह कथं छेँ थुनेगु ज्या जूगु खः ।

देवकाटा मदयेधुंकाः वय्कलं थ्व छेँ थः बिया मछ्वःनिम्ह म्ह्याय्यात त्वःता थकूगु खः । लिपा व म्ह्याय्म्ह नं क्यान्सर जुयाः मंत । वयां लिपा थ्व छेँ खाली हे जुल । तर छेँया हक धाःसा अपुतालीया रुपय् देवकाटाया निम्ह कायपिंत वन । कायपिंसं नं खास हे वास्ता मयाःगु कारणं देवकोटाया थ्व छेँया क्वय्या तल्लाय् ठेला पसः तइपिं बालं च्वनाच्वंगु खःसा च्वय्या तल्लाय् खा लहिना तःगु खः । तर छेँ तसकं जीर्ण जुयाः च्वने मजिसेंलि बालं च्वंपिं नं दना वन । वंगु १५ दँनिसें छेँ खाली हे जुयाच्वन ।

थ्व छेँ पशुपति महास्नान गुथियागु जूगुलिं देवकोटाया कायपिंसं मीगु कुतः यातं नं मी मफु । अन्तिमय् सरकारं हे छेँया मू ५ करोड तयाः निगूत्या करोड गुथियात व निगूत्या करोड देवकोटाया कायपिंत बियाः जग्गा दुकाःगु खः । आः ७ करोड ११ लाख तका खर्च यानाः अन म्युजियम दयेकेगु धाःसां देवकोटालिसे सम्बन्धित छुं सामान धाःसा मदुगु खँ नं धाःगु दु ।

गुलिसिनं प्रज्ञा प्रतिष्ठानया वर्तमान पदाधिकारीपिं केपी ओलीपाखें मनोनितपिं जूगुलिं ओली वनेवं उमित बदनाम यायेत मेगु खेमाया साहित्यकारतय्सं थुकिया विरोध याना हःगु खः धकाः नं धाःगु दु ।