इन्सेकपाखें सञ्चार ख्यःया भूमिका बारे अन्तक्रिया

ख्वप – अनौपचारिक क्षेत्र सेवा केन्द्र इन्सेक ख्वप शाखाया ग्वसालय् आइतवाः जिल्ला समन्वय परिषद्या ज्याकू ख्वपय् नागरिक समाज व सञ्चारकःमि जगत दथुइ सहकार्य विषयय् अन्तक्रिया ज्याझ्वः जुल ।

ज्याझ्वलय् पुलांम्ह उद्योग मन्त्री व सांसद महेश बस्नेतं स्थानीय निकायत संघीय व प्रदेश सभा स्वयां सबल, सक्षम व शासक हे तायेकीपिं खने दयाच्वंगुलिं समस्या ब्वलनावःगु न्ह्यथनादिसें केन्द्र व प्रदेश सभायात हे माने मयासें जुइगु प्रबृत्ति बांलाः मजू धयादिल । वय्कलं गलत नियत मतःसें ज्या यायेगु इलय् जुइगु कमी कमजोरी सह्य जुइ धयादिल ।

जिल्ला समन्वय समिति ख्वपया प्रमुख नवराज गेलालं ख्वपया प्यंगू नगरपालिकाया प्यंगू कथंया हे विशेषता दुगु न्ह्यथनादिसें नागरिक व जन प्रतिनिधि निगु हे निकायय् जवाफदेहिता मदुगु व नगरपालिका स्वयं स्वायत संस्था मखुगुलिं प्रदेश, संघ व स्थानीय निकायत थः हे पूर्ण मखुगुलिं छगूलिं मेगुलि परिपुरक कथं ज्या याना क्यनेमाःगु सुझाब बियादिल ।

सूर्यविनायक नगरपालिकाया उपप्रमुख जुना बस्नेतं सकलें जानाः ख्वपयात विकासया लँपुइ यंकेमाःगु खँय् बः बियादिल । मानव अधिकार सञ्चार सञ्जालया ख्वप प्रमुख रोशनराज अर्यालया सभापतित्वय् जूगु ज्याझ्वलय् गैर सरकारी संस्था महासंघ ख्वपया अध्यक्ष सोम शर्मा बजगाईं, युवाका लागि साथ साथ नेपालया महासचिव श्रीकृष्ण थापा, नेपाल पत्रकार महासंघ जिल्ला शाखा ख्वपया अध्यक्ष पुष्करराज बुढाथोकी, नेपाल उद्योग वाणिज्य महासंघया पुलांम्ह उपाध्यक्ष कृष्णप्रसाद ताम्राकार, वरिष्ठ चलचित्र निर्देशक मदन घिमिरे व इन्सेक ख्वपया प्रतिनिधि सविता केसीपिसं थःथःगु नुगःखँ कनादीगु खः ।