न्यू जेनिथय् विद्यार्थीतय् विदाइ

येँ – थनया ताम्सिपाखाय् च्वंगु न्यू जेनिथ इंग्लिश मोडेल स्कुलं एसइइ परीक्षा उत्तीर्ण यानादीपिं विद्यार्थीपिंत भिंतुना नापं विदाई ज्याझ्वः यात । नेपाः ब्यांक्वेटय् जूगु ज्याझ्वः स्कुलया संस्थापक भाइस प्रिन्सिपल पुष्पलाल श्रेष्ठया सभापतित्वय् जूगु खः ।

ज्याझ्वलय् मूपाहांकथं झायादीम्ह येँ मनपा १८ वडाअध्यक्ष न्हुछेकाजी महर्जनं एसइइ परीक्षा उत्तीर्ण यानादीपिं विद्यार्थीपिंत भिंतुना देछानादिसें छम्ह विद्यार्थी व छम्ह अभिभावकयात खादा क्वखायेकाः नापं विद्यार्थीपिंत मतिनाया चिं लःल्हानादिल । वय्कलं उत्कृष्ट लिच्वः हयेत ताःलाःगुलिं सकल विद्यार्थीलिसें अभिभावक, स्कुलया सकल शिक्षिक, शिक्षिका, कर्मचारीयात नं भिंतुना बियादिल ।

ज्याझ्वलय् केएमसी कलेजय् विज्ञानपाखेया प्रवेश परीक्षाय् सर्वोत्कृष्ट जुयाः कक्षा ११ व १२ य् पूर्ण छात्रवृत्ति प्राप्त यायेत सफल जूगु धासें स्कुलपाखें एसइइ उत्तीर्ण जुयादीम्ह रमेश रोकाययात विशेष सम्मान नं याःगु खः ।

स्कुलया संस्थापक राजु महर्जनं विद्यार्थीतय्त भिंतुना बियादिसे वइगु दिनय् गज्याःम्ह पासा ल्ययेबलय् थःगु जीवनय् न्ह्याबलें लसतां जाया च्वनी धइगु विषययात कयाः थःगु नुगःखँ तयादीगु खः ।स्कुलपाखें २०७५ सालया एसइइ परीक्षाय् सहभागि जुयादीपिं ५८ विद्यार्थीमध्ये ११ म्ह ‘ए प्लस’, २१ म्ह ‘ए’ १९ म्ह ‘बी प्लस’, खुम्ह ‘बी’ व छम्ह ‘सी’ ग्रेडय् उत्तीर्ण जूगु खः । ज्याझ्वलय् प्लस टूया प्रिन्सिपल विकास पौडेलं लसकुस यानादीगु खः ।