येँ मनपा व चन्दननाथ नपा दथुइ भगिनी सम्बन्ध स्थापना
येँ (नेपालभाषा टाइम्स) – येँ महानगरपालिका व जुम्लाया चन्दननाथ नगरपालिका दथुइ भगिनी सम्बन्ध स्थापना जूगु दु । देय्या संघीय राजधानीइ च्वंगु येँ मनपा व कर्णाली प्रदेशया जुम्लाय् च्वंगु चन्दननाथ नपा दथुइ थ्व हे वंगु पुस ७ गते जुम्लाया उद्योग वाणिज्य संघया सभाकक्षय् भगिनी सम्बन्ध स्थापना जूगु खः ।
भगिनी सम्बन्ध स्थापना सम्बन्धी सहमतिपती येँ मनपाया प्रमुख विद्यसुन्दर शाक्य व चन्दननाथ नगरपालिकाया प्रमुख कान्तिका सेजुवालं ल्हाःचिं तयादीगु खः । निगू स्थानीय तह दथुइ भगिनी सम्बन्ध स्थापना लिसें चन्दननाथ नगरपालिका वडा नं. ३ य् च्वंगु धिमी पार्क निर्माणय् नं साझेदारी यायेगु सम्झौतापती ल्हाःचिं तयेगु ज्या जूगु खः । सहमतिकथं पार्क निर्माणया निंतिं येँ मनपां आर्थिक दँ ०७७/७८य् स्वीकृत बजेटपाखें छगू करोड न्यय्गू लाख तका उपलब्ध याकीगु जूगु दु ।
थनिं दछि न्ह्यः २०७६ पुस १७ गते च्वंगु येँ मनपाया कार्यपालिकाया बैठकं जुम्लाया चन्दननाथ नगरपालिकालिसे भगिनी सम्बन्ध स्थापना यायेगु निर्णय याःगु खः । उगु इलय् येँ मनपा प्रमुख शाक्यं स्थानीय सरकारया विविधता दुने समानता मालेगु, अनुभव व सिकाइ कालबिल यायेगु उद्देश्यं देय् दुनेया नगरलिसे भगिनी सम्बन्ध स्थापना यानागु खँ कनादिल । चन्दननाथया प्रमुख सेजुवालं येँ मनपालिसेया भगिनी सम्बन्धयात थःपिंसं गौरवया महसुस यानागु धासें नगरवासीयापाखें आभार प्वंकादिल ।
LEAVE YOUR COMMENTS