धर्म व संस्कृति अन्तर्राष्ट्रिय सम्मेलन घोषणपत्र जारी यासें क्वचाल

येँ – बुद्ध जन्मस्थल लुम्बिनीइ जूगु अन्तर्राष्ट्रिय सम्मेलन स्वंगू बुँदाया लुम्बिनी घोषणा पत्र जारी यासें क्वचाःगु दु । नेपाल सरकार, लुम्बिनी विकास कोष व बेलायतया विनचेस्टर विश्वविद्यालयया मंकाः ग्वसालय् ‘ ‘दक्षिण एशियाय् शान्ति व मेलमिलापया निंतिं धर्म व संस्कृतिया भूमिका’ विषयय् निन्हुयंकं उगु सम्मेलन जूगु खः ।

सम्मेलनं दक्षिण एशियाय् खने दयाच्वंगु जातीय व धार्मिक द्वन्द्व न्यूनीकरण यानाः शान्ति स्थापनाया निंतिं कुतः यायेगु, बुद्ध जन्मस्थल लुम्बिनीयात अन्तर्राष्ट्रिय शान्ति केन्द्रया रुपय् विकास यायेगु व थुकिया निंतिं दक्वं देशं सहकार्य यायेगु, दँय्दसं लुम्बिनीइ अन्तर्राष्ट्रिय शान्ति सम्मेलन यायेगु निर्णय याःगु खः । सम्मेलनया झ्वलय् जूगु सहलहया निष्कर्ष लुम्बिनीस्थित मायादेवी देगः परिसरय् दीप प्रज्वलन यासें सार्वजनिक याःगु खः ।

सम्मेलनय् सहभागि १५ गू देय्या झिंनिम्हेसिनं थीथी विषयय् ज्यापौ न्ह्यब्वयादीगु खः । ज्याझ्वलय् थीथी देशं द्वन्द्व अन्त्यया निंतिं याःगु कुतः, धार्मिक व साम्प्रदायिक युद्धया समाधानया उपाय लगायतया विषयय् भारतया प्रा. प्रियंका चक्रवर्ती, केन्ट विश्वविद्यालयया प्रोफेसर ह्युग मियल, नेपाःया डा. योगी सिंहनाथ, इन्डोनेशियाया अनिसा मार्टियाना, बेलायतया प्राध्यापक मार्क वाइन, नेदरल्याण्डया जोना थानवुरी लगायतं ज्यापौ न्ह्यब्वयादीगु खः ।
निन्हुयंकं जूगु सममेलनय् नेपाःलिसें भारत, बंगलादेश, क्यानाडा, श्रीलंका, नेदरल्याण्ड, इन्डोनेशिया, बेलायतया विज्ञतय् सहभागिता दुगु खः ।