ने. सं. ११४४ कछलागा पञ्चमी -

नेपाःया भूभाग कुञ्जिइ भारतीय प्रमया प्रवेश

येँ (नेपालभाषा टाइम्स)-भारतीय प्रधानमन्त्री नरेन्द्र मोदीं नेपाःया सीमा दुने लानाच्वंगु कालापानी क्षेत्रया कुञ्जी गामय् दुहां वनाः नेपाःया सार्वभौमिकता व अखण्डतायात हाथ्या बिउगु दु । नेपालं जारी याःगु न्हूगु ‘चुच्चे नक्सा’ दुने समावेश जुयाच्वंगु उगु भूभाग् अनायास प्रवेश यानाः वय्कलं नेपाःया सीमा दावीयात हाथ्या बियादीगु खः ।

उगु लागायात भारतया उत्तराखण्ड राज्यया पिथौरागढ दुने लाकातःगु दु । वय्कलं उत्तराखण्डया मुख्यमन्त्री पुष्कर धामी सहित वनाः अन च्वंगु आदी कैलाश महाद्यःया दर्शन यानादीगु खः । थ्व थासय् महाद्यःया दर्शन यायेगु खास आवश्यक मदुगु खः । तर मोदीं नेपाःयात हाथ्या बीत हे थ्व भ्रमण यानादीगु अनुमान याःगु दु ।

इजरायलय् झिम्ह नेपाःयात स्याःगु कारणं नेपाः शोकय् लानाच्वंगु इलय् जःलाखःला देय् भारतीय प्रधानमन्त्रीं नेपाःया भूमिइ थःगु दावीयात क्वातुकेगु कुतः याःगु अनुमान याना हःगु दु ।

छुं ई न्ह्यः चीनं जारी याःगु न्हूगु नक्साय् नं थ्व भूभागयात नेपाः दुने मलाकुसे भारत दुने लाकातःगु खः । उकिया बारे नेपालं थःगु आपत्ति प्वंके धुंकूसां चीनं धाःसा खास प्रतिक्रिया बिउगु मदुनि । सम्भवतः चीनं अज्याःगु नक्सा जारी याःगु कारणं नं भारतयात उगु भूभागय् थःगु दावी क्वातुका यंकेत तिबः जूगु अनुमान कुटनीतिक ख्यलं यानाहःगु दु ।

भारतपाखें उगु लागाय् आः तःधंगु विकास निर्माणया योजना नं न्ह्यःने न्ह्याकीगु जूगु दु । अन आः भारतं ४१०० करोड तका बराबरया तःधंगु परियोजना सञ्चालन यायेत्यंगु दु । प्रम मोदी उकिया उलेज्या यायेगु लागिं नं म्हिगः थ्यंगु खः । उगु थासय् उलि तःधंगु परियोजना शुरु यात धाःसा अन नेपाःया दावी धमाधम फ्यासुया वने फुगु खँ नं धयाहःगु दु ।

भारतीय प्रम मोदीं म्गिः कुञ्जि गामय् वनाः अन तैनाथ यानातःपिं भारतीय सुरक्षाकर्मीत व स्थानीय मनूतलिसे नं खँल्हाबल्हा यानादीगु खः । स्थानीय मनूतलिसे खँल्हाबल्हा याःगुया कारण अन च्वंपिं स्थानीय मनूतय् भावना नेपाःपाखे दु लाकि भारतपाखे दु धकाः सीकेगु लागिं नं जुइमाः धइगु अनुमान याःगु दु । कुञ्जि गां नेपाःया भूभाग दुने लाः धकाः नेपालं दावी यानाच्वंसां अनया स्थानीय मनूतय्सं धाःसा भारतीय प्रधानमन्त्रीया भ्रमणयात छुं विरोध मयाःगु खः ।

भारतं अन तःधंगु मात्राय् विकास निर्माणया ज्या न्ह्याकाः अन च्वंपिं स्थानीय मनूतय्त नं थःगु पक्षय् हयेत स्वःगु अनुमान याःगु दु । उगु भूभाग नेपाः दुने लाः धाःसां आः तक नेपाःया प्रशासन थ्यने फुगु मदुनि । नेपाःया सुं नेतां आः तक उगु लागाया भ्रमण नं याःगु मदुनि । मोदीया थ्व भ्रमणयात नेपालय् विरोध यानाहःगु दु ।