चिकित्सक संघया कडा ख्याच्वः

येँ – नेपाल चिकित्सक संघं देय्न्यंकंया अस्पतालय् आकस्मिक बाहेकया सेवा बन्द यायेगु घोषणा याःगु दु । बिहीवाः राष्ट्रियसभां चिकित्सा शिक्षा विधेयक पारित यायेवं संघं आन्दोलनया घोषणा याःगु खः ।

डा. गोविन्द केसीया जीवन रक्षाया निंतिं याःगु ज्याझ्वःयात वेवास्ता याःगुलिं स्तब्ध जूगु खँ संघं धाःगु दु । डा. केसी नीस्वन्हु न्ह्यवंनिसें अनसन च्वनाच्वंगु दुसा वय्कःया समर्थनय् संघं देय्न्यंकं दबाबमूलक ज्याझ्वः याना वयाच्वंगु दु ।

डा.केसीया जीवन रक्षाया निंतिं सरकारं छुं हे कुतः मयाः धासें संघं थनिंनिसें सांकेतिक आन्दोलन स्वरुप देय्न्यंकंया सरकारी, गैरसरकारी, निजी, मेडिकल कलेज लगायत फुक्कं स्वास्थ्य संस्थाय् आकस्मिक बाहेकया मेगु फुकं स्वास्थ्य सेवा बन्द यायेगु निर्णय याःगु दु । लिसें कडा पलाः ल्ह्वनेगु परिस्थिति सिर्जना मयायेत व वार्तापाखें समस्याया समाधान मालेत नं सरकारयात इनाप याःगु दु ।

यदि अथे मजुल धाःसा आन्दोलनया कारणं स्वास्थ्य क्षेत्रय् ब्वलनीगु परिस्थितिया जिम्मेवार सरकार हे जुइगु ख्याच्वः नं संघया महासचिव डा. लोचन कार्कीं जारी याःगु विज्ञप्तिइ बियात तःगु दु ।