ने. सं. ११४४ कौलाथ्व तृतीया -

लोपोन्मुख नौ बाजा सम्मेलन सम्पन्न

येँ (नेपालभाषा टाइम्स)- केन्द्रीय मानन्धर संघं तना वनेत्यंगु बाजं संरक्षण यायेगु अभियान न्ह्याकूगु दु । अमूर्त सम्पदा जुयाच्वंगु नेपाःया मौलिाक बाजं न्हूगु पुस्तायात हस्तान्तरण यायेगु ताः तयाः संघं अभियान न्ह्याकूगु खः । थ्व हे झ्वलय् संघं येँ महानगरपालिकाया ग्वाहालिं मध्यपुर थिमिया क्वलाखु क्षेत्रय् नांबाजा सम्मेलन ११४४ याःगु दु ।

गुताजि बाजंया समिश्रण दुगु नौबाजा विशेषत स्वनिगः व काभ्रेय् थायेगु याना वयाच्वंगु दु । बौद्धमार्गी नेवाःतय् संरक्षण याना वयाच्वंगु नौबाजायात गौतम बुद्धया इलय् कपिलवस्तुया राजकीय बाजं कथं मान्यता कयातःगु बाजं जूगु विश्वास यानातःगु दु ।

श्रृंगभेरी अपदानया बाखं व स्वयम्भू पुराणय् उल्लेख जुयाच्वंगु नौबाजा लिपांगु इलय् धाःसा तनावनीगु अवस्थाय् थ्यनाच्वंगु दु । उकिं संघं थुगुसी न्हपांखुसी नेकू, पस्ताः, धाः, चति, डबडब, नगरा, खिं, पछिमा, प्वंगा, ताः, भुस्या, छुस्या, पस्ता, नाय्खिं, धिमेचा, बेया संगीत थीथी ताल व बोलय् ब्वज्या याःगु खः ।

केन्द्रीय मानन्धर संघ अन्तर्गतया युवा उपसमिति व संचार उपसमितिया संयोजनय् मध्यपुर थिमिया सिवा साय्मि खलः व मानन्धर युवा पुचःलिसे जानाः ज्याझ्वः याःगु खः । ज्याझ्वःया उलेज्या थिमि नगरपालिकाया मेयर सुरेन्द्र श्रेष्ठं यानादीगु खः ।

ज्याझ्वलय् ख्वपया साःक्वलान, गोलमढी, तेखाच्व, बनेपाया वांख्यो व क्वसाः दाफा भजन खलः, थिमिया सिवा साय्मि खलकं नौबाजा थानाः न्ह्यब्वःगु खः ।