चिनियाँ मन्त्रीया नेपाः भ्रमण भारतयात मयल
येँ (नेपालभाषा टाइम्स) – चिनियाँ रक्षामन्त्री लिसें स्टेट काउन्सिलर वेइ फेङहीपाखें म्हीग जूगु छन्हुया नेपाः भ्रमणयात भारतं धाःसा मययेकूगु सीदुगु दु । नेपाःया निंतिं भारतया पुलांम्ह राजदूत रणजित रायं भारतय् जूगु छगू वेविनार ज्याझ्वलय् न्ववासें नेपालं चिनियाँ रक्षा मन्त्रीयात थःगु देय्या भ्रमण याकाः असंवेदनशील ज्या यात धकाः आलोचना यानादीगु खः ।
वय्कलं चिनियाँ रक्षामन्त्री नेपाः वये न्ह्यः हे उगु भ्रमणयात कयाः असन्तुष्टि प्वंकादीगु खः । वय्कःया थ्व धापूयात भारतीय सरकारया हे धापू कथं कुटनीतिक ख्यलं थुइकूगु दु । पुलांम्ह राजदूत रायं नेपाःलिसे थःपिनि स्वापू बांलाकेगु लागिं भारतं कुतः शुरु याःगु हे इलय् नेपालं चिनियाँ रक्षामन्त्रीयात नेपाः सःताः भारतया भावनायात वेवास्ता यात धकाः बिचाः तयादीगु खः । नेपाः-भारत स्वापू बांलाकेगु लागिं भारतं गज्याःगु भूमिका म्हिताच्वन धइगु खँय् नेपालं छुं हे चिन्ता मकाःगु द्वपं नं वय्कलं बियादीगु दु ।
चिनियाँ रक्षामन्त्रीपाखें स्वदँया दुने निक्वः नेपाः भ्रमण याःगु खँयात नं वय्कलं रहस्यमय ज्याया रूपय् कयादीगु दु । थुकियात वय्कलं भारतीय सेनाया सेनापतिं यानादीगु नेपाः भ्रमणलिसे सन्तुलन मिले यायेत जूगु कुतः धकाः नं व्याख्या यानादीगु दु ।
वंगु छुं ईया दुने हे भारतपाखें नेपालय् स्वंगू तःधंगु उच्चस्तरीय भ्रमण जुइधुंकूगु दुसा उकिया हे दथुइ चीनपाखें नं रक्षामन्त्रीया थुगु भ्रमण जूगु खः । भारतपाखें स्वंगू तःधंगु उच्चस्तरीय नेपाः भ्रमण जूसां उगु भ्रमण राजनीतिक स्तरया मजुसे कर्मचारीस्तरया जक जूगु खः । राजदूत रायं नेपाः भारत स्वापू लिपांगु इलय् तसकं ख्वाउँसे च्वना वनाच्वंगु कारणं उकियात सुधार यायेगु लागिं क्वंनिसें ज्या न्ह्याकेगु कुतः कथं अज्याःगु स्तरया भ्रमण जूगु संकेत नं बियादीगु दु ।
भारतपाखें याःगु थ्वहे भ्रमणया झ्वलय् नेपाःया परराष्ट्र मन्त्रीयात वार्ताया लागिं दिल्ली वयेत ब्वनापौ नं बियाथकूगु दु। तर नेपाःपाखें जुइगु भारत भ्रमण बारे धाःसा नेपाः सरकारं आः तक छुं न्ववाःगु मदुनि । नेपाःया सत्तारुढ दल दुने ब्वलंगु कचवं समाधान यायेगु लागिं छुं ई न्ह्यः नेपाःया लागिं चिनियाँ राजदूत सक्रिय जूगु खः । चिनियाँ राजदूतया थ्व सक्रियतायात नं भारतं ‘चान्हय् चान्हय् वनाः नेपाःया नेतात नापलायेगु ज्या यात’ धकाः गैरकुटनीतिक भासं आलोचना याना हःगु खः ।
LEAVE YOUR COMMENTS