जापान सरकारया ग्वाहालिइ निगूगु पुलांगु विद्यालय पुनःनिर्माण

यल – यलय् च्वंगु पाटन माध्यमिक विद्यालयया पुनःनिर्माण याइगु जूगु दु । तःभुखाचं क्षति जूगु उगु विद्यालय जापान सरकारया ग्वाहालिइ पुनःनिर्माण जुइत्यंगु खः । वि.सं. १९९९ सालय् स्थापना जूगु विद्यालय नेपालय् दरवार हाईस्कुल लिपा चायेकूगु निगूगु विद्यालय खः ।

विद्यालय पुनःनिर्माणया निंतिं जूगु छगू ज्याझ्वःया दथुइ यल महानगरपालिकाया प्रमुख चिरीबाबु महर्जन व राष्ट्रिय पुनःनिर्माण प्राधिकरणया प्रमुख कार्यकारी अधिकृत सुशील ज्ञवाली शिलान्यास यानादीगु खः ।

यल मनपाया प्रमुख महर्जनं विद्यालय निर्माण यायेबलय् गुणस्तरीयता ध्यान बीत निर्माण कम्पनीयात इनाप यासें यल मनपा दुने निर्माण जुइगु गुगुनं भवन लगायतया संरचनाय् गुणस्तरीयताय् सम्झौता जुइमखु धयादिल ।

देशय्या हे निगूगु पुलांगु विद्यालय पुनःनिर्माण जू वनाच्वंगु खँय् लसता प्वंकादीसें प्राधिकरणया प्रमुख कार्यकारी अधिकृत ज्ञवालीं भुखाचं देय्न्यंकं ७,५५३ विद्यालय क्षति जूगुलिइ आतकया दुने प्यद्वलं मल्याक विद्यालय पुनःनिर्माण जुइधुंकूगु जानकारी बियादिल ।

विद्यालयया प्रधानाध्यापक ईश्वरमान वज्राचार्यं भुखाचं विद्यालय भवन क्षतिग्रस्त जुइवं विद्यार्थीतय्त टहरा दयेकाः अध्यापन याका वयाच्वनागु व आः याकनं हे न्हूगु भवनय् अध्यापन याके खनीगु आशा यानादिल ।

विद्यालय व्यवस्थापन समितिया नायः किरण महर्जनं विद्यालयया भौतिक व शैक्षिक ुगुणस्तर सुधारया निंतिं यल मनपापाखें आवश्यक ग्वाहालि दइगु आशा यानादिल । स्वंगू ब्लकय् २७ कू क्वथा दइगु विद्यालय भवन निर्माणय् १८ करोड ५० लाख लागत तुइगु अनुमान यानातःगु दु ।