लुम्बिनी खुल्ला, मायादेवी अझं बन्द

लुम्बिनी – कोरोना संक्रमण अप्वया वनेवं बन्द यानातःगु लुम्बिनी उद्यान थनिंनिसें खुल्ला याःगु दु । लुम्बिनी उद्यान खुल्ला याःसां मायादेवी देगः धाःसा बन्द हे यानातःगु दनि ।

लुम्बिनी विकास कोषया सदस्य सचिव सानुराजा शाक्यं कनादीकथं पर्यटनलिसे स्वापू दुगु थायत खुल्ला याना यंकेगु सरकारया निर्णय कथं लुम्बिनीइ मायादेवी देगः छगू बाहेक मेगु फुक्क हे क्षेत्र खुल्ला याःगु खः । आः लुम्बिनी भ्रमणय् वनीपिंसं अन दुने च्वंगु थीथी देय्या विहार, उद्यान आदि चाःहिले खनी । सरकारं धार्मिकस्थलत खुल्ला यायेगु निर्णय मयाःनिगु कारणं मायादेवी देगः खुल्ला मजूगु खँ कँसें सदस्य सचिव शाक्यं धयादिल, ‘सरकारं धार्मिकस्थल खुल्ला यायेगु निर्णय यायेवं मायादेवी देगः नं खुल्ला जुइ ।’

विश्व सम्पदा धलखय् दुथ्याःगु लुम्बिनी नेपाःया आन्तरिक पर्यटक लिसें भारत व विश्वया थीथी बौद्ध देय्या मनूतय् लागिं धार्मिक पर्यटनया प्रमुख केन्द्र जुया वयाच्वंगु दु ।