ने. सं. ११४६ बछलागा दशमी -

हात्तिवन-गोदावरी सतक दयेके क्वचाइन

यल (रासस) – यलया हात्तीवननिसें गोदावरी कुण्ड तकया सतक दयेकेगु ज्या वइगु निला दुने क्वचाइगु जूगु दु । निर्माण व्यवसायीतय्सं नियमित रुपं दयेकेगु ज्या यानाच्वंगुलिं इलय् हे ज्या क्वचाइगु खँ काठमाडौं उपत्यका सतक विस्तार आयोजनां धाःगु दु । थ्व सतक निगू ठेक्काय् दयेके ज्या न्ह्यानाच्वंगु व थ्व निगुलिं ठेक्का पुष मसान्त तक जक दुगु खँ आयोजना प्रमुख गुरु अधिकारीं धयादीगु दु । वय्कःया कथं सरकारं २० मिटर चौडाइ कायम यानाः दयेकेगु ज्या न्ह्याकूगु खःसां स्थानीयतय् विरोधया कारणं ताःई तक ज्या जुइमफुगु खः । वंगु पुसय् मन्त्रिपरिषद्या बैठकं विस्तारित सतक उपलब्ध चौडाइ दुने हे पिच यायेगु धकाः निर्णय यायेधुंकाः आः व हे कथं ज्या न्ह्याकूगु खः । वय्कलं २० मिटर चौडाइया सतक दयेकेमाःगु खःसां अप्वः थाय् थ्व स्वयां म्हो जक चौडाई दइगु जूगु दु ।