मेट्रो रेल दयेकेत ठेकेदार ल्यज्या

येँ – नागढुंगा–धौख्यः मेट्रो रेलया विस्तृत सम्भाव्यता अध्ययनया निंतिं खुगू कम्पनी प्रारम्भिक छनौटय् लाःगु दु ।

लगानी बोर्डं विस्तृत सम्भाव्यता अध्ययनया निंतिं आह्वान याःगु ग्लोबल टेण्डरय् नीस्वंगू कम्पनीं आवेदन बिउगु खःसां खुगू जक कम्पनी छनौट जूगु खः ।
छनौटय् लाःगु कम्पनी बुझे याःगु थप विवरणया आधारय् सम्भाव्यता अध्ययन याइगु कम्पनीयात छनौट याइगु खँ लगानी बोर्ड धाःगु दु । सम्भाव्यता अध्ययन याइगु कम्पनीं विस्तृत व डीपीआर स्वयां क्वय्या स्तरया प्रतिवेदन तयार याइगु खँ धाःगु दु ।

विस्तृत सम्भाव्यता अध्ययन व विस्तृत परियोजना प्रतिवेदन तयार जुइधुंकाः लगानी बोर्डया हे नेतृत्वय् निर्माण, सञ्चालन व हस्तान्तरण (बुट) ढाँचाय् उगु रेलमार्ग दयेकेगु प्रक्रिया न्ह्याकीगु खँ धाःगु दु । लगानी बोर्डया वैशाख १५ गते च्वंगु बैठकं ४५ किलोमिटर ताःहाःगु नागढुंगा–कलंकी–कोटेश्वर–धौख्यः मेट्रो रेलया विस्तृत सम्भाव्यता अध्ययनया प्रक्रिया न्ह्याकेगु निर्णय याःगु खः ।

मेट्रो रेल दयेकेया लागिं प्रति किलोमिटर लागत ४ अर्ब तका थ्यनीगु प्रक्षेपण यानातःगु दु । उकिया मुक्कं लागत १८० अर्ब तुइगु अनुमान दु ।