भक्तपुर युवा टीमया चेस कासा क्वचाल

ख्वप(नेपालभाषा टाइम्स)- भक्तपुर युवा टीमया ग्वसालय् जूगु स्वर्गीय त्रिरत्न ग्वाछा लुमन्ति खुल्ला चेस कासा रुपेश जैसवालं त्याकूगु दु । कासाय् सुदीप तामाङ लिउ व बद्रीलाल नेपाली लियांलिउ लाःगु दु ।

शुक्रवाःनिसें न्ह्याःगु कासाय् सुरोज महर्जन, सुशिल चौधरी, क्षितिज भण्डारी, सुरवीर लामा, नवीन तण्डुकार, सुसोन दाहाल व राजेश कक्षपति छसिकथं प्यंगूगुनिसें झिगूगु थासय् लाःगु खः ।

कासाय् विजयी जुयादीपिंत वंगु शनिवाः जूगु छगू ज्याझ्वःया दथुइ सिरपाः व दसिपौ लःल्हाःगु खः । बागमति प्रदेशसभा सदस्य सुरेन्द्ररराज गोसाइँ कासाय् त्याःपिंत सिरपाः व दसिपौ लःल्हानादीगु खः ।

कासाय् न्हापयात नीन्याद्वः, लिउयात झिंन्याद्वः, लियांलिउयात झिद्वः तका दां सिरपाः लःल्हाःगु खः । अथे हे प्यंगूगु थाय् लाःम्हेसित च्याद्वः, न्यागूगु थाय् लाःम्हेसित खुद्वः व हःपाःकथं न्याद्वः, न्याद्वः तका दां सिरपाः लःल्हाःगु खः ।

कासाय् खुम्ह मिसा व विदेशी कासामिलिसें १४० म्हेसिनं ब्वति काःगु ग्वसाः खलःया नायः केशव त्वाय्नावासुं कनादीगु दु । उगु कासा पीन्यान्हु न्ह्यः मत्यवं मदुम्ह टीमया दुजः त्रिरत्न ग्वाछाया लुमन्तिइ जूगु खः । मदुम्ह ग्वाछा ख्वपया नांजाःम्ह चेस कासामि नं खः ।

मदुम्ह ग्वाछाया जहान लक्ष्मीश्वरी ग्वाछायात कदर पत्र नं लःल्हाःगु ज्याझ्वलय् संस्थाया संस्थापक अध्यक्ष विश्वराम कवां, ख्वप नपा ७ वडअध्यक्ष उकेश कवां, केन्द्रीय बुद्धिचाल संघया अध्यक्ष विदुरप्रसाद गौतम, भक्तपुर खेलकुद विकास समितिया अध्यक्ष दीपक थापा, संस्थाया सचिव रामेश्वर मचामसी लगायतं नुगःखँ तयादीगु खः ।