स्वनिगःया खुसि उत्खनन् तीव्र

येँ (नेपालभाषा टाइम्स) – स्वनिगः दुनेया थीथी थासय् च्वंगु खुसि उत्खनन् यानाः फि लगायत नदीजन्य पदार्थया व्यापार यायेगु ज्या तीव्ररुपं जुया वयाच्वंगु दु। खुसिपाखें फि व नदीजन्य पदार्थ उत्खनन् याये मदइगु व्यवसथा जुयाच्वंसां लिपांगु इलय् तीव्ररुपं उकथंया ज्या जुयाच्वंगु दु ।

स्थानीय तहं नदीजन्य पदार्थ पटके कर कयाः उत्खनन् यानाच्वंगु दु। वासिब व खानीपाखें पिहां वइगु फिया निंतिं जक ठेक्का बीगु धाःसां खुसिया फि तकं खुयाः चोरी निकासी यायेगु ज्या अप्वया वनाच्वंगु दु। विशेष यानाः बागमति, विष्णुमति, मनोहरा, रुद्रमति लगायतया खुसिया मुहानस्थलं हे उकथं नदीजन्य पदार्थया चोरी निकासी जुयाच्वंगु मखसे अज्याःगु खुसिया जःखः लाःगु नगरपालिका क्षेत्रय् हे फि द्वँ तकं तयातःगु दु ।

महानगरीय प्रहरी वृत्त बौद्धया प्रहरी प्रमुख नवीन कार्कीं स्वनिगलय् नदीजन्य पदार्थ उत्खनन् यायेगु व लिकाये मदुगु व्यवस्था जूसां अप्वःथें नगरपालिकां ठेकेदारयात ठेक्का हे बियातःगु धयादिल । थुकथं ठेक्का बियाच्वंपिं स्वनिगःया शंखरापुर (सक्व), कागेश्वरी मनहरा, गोकर्णेश्वर, बुढानीलकण्ठ (भुइजःसि) नगरपालिका खः। थुपिं नगरपालिकां पटके करया ठेक्का बियातःगु सीदुगु दु ।