आः फास्ट ट्राय्कया जीरो प्वाइट खोना मखु बुंग

येँ – नेपाल सरकारं सेनाया ग्वाहालिइ दयेकेगु तयारी यानाच्वंगु येँ–निजगढ फास्ट ट्रयाकया जिरो प्वाइन्ट आः खोनाय् मतसे बुंगय् तयेगु निर्णय याःगु दु । आः बुंगया फर्सिडोलय् जिरो प्वाइन्ट तयेगु कथं सर्भे जुयाच्वंगु दु । थ्व स्वयां न्हापा खोनायात जिरो प्वाइन्ट यायेगु तयारी जुयाच्वंगु खः । स्थानीय जनता, वडा कार्यालय, जिल्ला समन्वय समिति, ३ नम्बर क्षेत्रया सांसदपिं लिसें थीथी थाय्या मनूतय् संलग्नताय् उगु निर्णय जूगु खँ स्थानीय वासिन्दा इन्द्रमान तुलाधरं ‘नेपालभाषा टाइम्स’ यात कनादीगु दु ।

सेना, स्थानीय जनता व रक्षा मन्त्री ईश्वर पोखरेल दथुइ जूगु छगू सहलह ज्याझ्वलय् मन्त्री पोखरेलं जनताया माग कथं ज्या न्ह्याकेत निर्देशन बिउगु खःसा वयां लिपा च्वंगु प्यंगू न्यागू बैठक लिपा बुंगयात जिरो प्वाइन्ट दयेकेगु खँय् सहमति जूगु खः ।
न्हापा खोनायात जिरो प्वाइन्ट दयेकल धाःसा उकिं आपालं स्थानीय जनताया जग्गा लाइगु जूगु खः ।

तर आः बुंगय् जिरो प्वाइन्ट दयेकल धाःसा बछि जक जग्गा अधिग्रहण याःसां गाःगु खँ नं तुलाधरं कनादीगु दु । वय्कःया कथं खोनाय् जिरो प्वाइन्ट दयेकेबलय् ७११ रोपनी जग्गा अधिग्रहण यायेमाःसा आः बुंगय् जिरो प्वाइन्ट दयेकेबलय् ३०० रोपनी जग्गा अधिग्रहण याःसा गाःगु खँ नं वय्कलं कनादिल ।

बुंगय् जिरो प्वाइन्ट दयेकेवं फास्ट ट्रयाकया लागत नं म्हो जुइगु खँ धाःगु दु । म्हो जक जग्गाया मुआब्जा बिउसां गाःगुलिं लागत म्हो जुइत्यंगु खः । अथेहे सेनां फास्ट ट्रयाक दयेकेगु झ्वलय् सुरुङ मार्ग ताःहाकः यानाः अन ताँ कम जक तइगु जूगु दु । सेनां सुरुङ मार्गयात महत्व बिउगु खँ सीदुगु दु ।