रेल हानं भारतय् तुं लिहां वन

येँ (नेपालभाषा टाइम्स) – नेपालं भारतयाके न्याना हःगु निगू सेट रेल म्हीग जनकपुरय् नेपाली अधिकारीतय्त हस्तान्तरण यायेवं हानं भारतया जयनगरय् तुं लिहां वंगु दु। नेपाःयात रेल हस्तान्तरण याःसां नं गबलेनिसें चले यायेगु धइगु ठेगान मदुगुलिं सुरक्षाया लागिं भारतया जयनगरय् तुं लित यंकूगु खः । अनया नेपाली स्टेशनय् थ्व रेल सुरक्षितपूर्वक तयातइगु खँ धाःगु दु ।

रेल नेपाः थ्यंकः वःसां थुकिया सञ्चालन बारे धाःसा सरकारं आः तक छुं हे योजना मदयेकूनिगु खँ धाःगु दु। अथे खःसां नेपाःया रेल विभागं धाःसा कोरोना महामारीया कारणं तुरुन्त रेल चले याये फइगु अवस्था मदुनि धाःगु दु। कोरोनाया समस्या मदुगु खःसा मोहनि न्ह्यः हे रेल चले याये फइगु खःसां आः गबलेनिसें चले जुइ धइगु खँ धाःसा सरकारं धाःगु मदुनि । प्रतिघन्टा ११० किमि ब्वाँय् वनीगु थ्व रेलं छक्वलं १३०० म्ह यात्रु क्वबीफु। म्हीग रेल हःगु स्वयेत कोरोना महामारीया वास्ता मयासे द्वलंद्वः मनूत जनकपुरया रेलवे स्टेशनय् मुं वःगु खः ।