नागरिक समाजया चिउताः

येँ -संसद पुनस्र्थापना जुइसातकि सकलें राजनीतिक पार्टीत हानं सत्ता समीकरणया खेलय् हे लगे जूगु खनाः नागरिक समाजं चिउताः प्वंकाहःगु दु । थ्व झ्वलय् नागरिक समाजया न्ह्यलुवा मल्ल के. सुन्दरं संसद पुनस्र्थापना जुइधुंकाः आः राजनीतिक पार्टीतय्सं नागरिक समाजं न्ह्यःने हःगु मागयात सम्बोधन यायेमाःगु खँ धयादीगु दु । नेपालभाषा टाइम्सलिसे खँ ल्हासें वय्कलं धयादिल, ‘सर्वोच्चया फैसलां प्रतिगमनया पलाः ला करेक्सन जुल, तर वर्तमान संविधान दयेकूगु इलय् हे गुगु त्रुटि जूगु खः आः दलतय्सं उकियात करेक्सन यायेमाः ।’

वंगु फागुन ७ गते नागरिक समाजपाखें खुल्ला मञ्चय् छगू सभा यासें देय्या मूल कानूनयात संशोधन यायेमाः धकाः गुगु माग न्ह्यःने तःगु खः उकियात पूवंकेमाःगु माग यानादिल । उकथं हे नांजाःम्ह च्वमि राजेन्द्र महर्जनं नं आः दलतय्सं नागरिक समाजं न्ह्यःने हःगु मागयात पूवंकेगुपाखे ध्यान बीमाःगु खँ कनादिल । नेपालभाषा टाइम्सयात वय्कलं धयादिल, ‘यदि आः नं दलतय्सं नागरिक समाजया मागयात ध्यान मबिल धाःसा नागरिक समाजं हानं आन्दोलन याइ ।’

मेखे पुलांम्ह प्रधानमन्त्री डा. बाबुराम भट्टराईनं ट्विट यासें संसद पुनस्र्थापना लिपा राजनीतिक पार्टीत हानं सत्तासमीकरणय् लगे जूगु धासें दुःख प्वंकादीगु दु । वय्कलं आः दलत जनताया समस्याय् केन्द्रित जुइत नं इनाप यानादीगु दु ।

 

सम्बन्धित बुखँ

LEAVE YOUR COMMENTS