लकडाउन : प्रमपाखें चीकेगु संकेत, स्थानीय प्रशासन अन्यौलय्

येँ- थौं भदौ २४ गते चान्हसिया १२ बजेनिसें क्वचाइगु लकडाउन क्वचायेका छ्वयेगु वा हानं म्याद थपे यानाः बढे यायेगु धइगु निर्णय याये मफयाः स्वनिगःया स्थानीय सरकार व स्थानीय प्रशासन अन्यौलय् लाःगु दु । येँ, यल, ख्वप स्वंगुलिं जिल्लाया सीडीओ व स्थानीय सरकार जानाः स्वनिगलय् छवाःयंकंया लकडाउन याःगु खःसा दथुइ छकः छवाःया म्याद थप यायेधुंकूगु दु । थ्व छवाः थौं क्वचायेत्यंगु खः ।

लकडाउनया इलय् नं कोरोना संक्रमितया ल्याः अप्वयां तुं च्वंगु कारणं छखे लकडाउन हानं थपे यायेमाः धइगु सः थ्वयाच्वंगु दुसा मेखे लकडाउनं यानाः ज्या याये मखन धकाः मजदूर व उद्योग वाणिज्य ख्यलं सः तया हयाच्वंगु दु । लकडाउनं यानाः मजदूरी यानाः नये मखन धकाः म्हिगः तिनि ट्याक्सी व्यवसायीतय्सं यातायात व्यवस्था विभाग न्ह्यःने धर्ना बिउगु खः । उमिसं म्हिगः लकडाउनया अवज्ञा यासें लँय् ट्याक्सी चले यानाः समेत क्यंगु खः । अथे हे उद्योग व्यवयासीतय्सं नं म्हीग प्रधानमन्त्री केपी शर्मा ओलीयात नापलानाः लकडाउनं यानाः देय्या उद्योग वाणिज्य ख्यः चौपट जूगु धासें लकडाउन क्वपालेत इनाप याःगु खः । उगु इलय् प्रम ओलीं लकडाउनं यानाः देशय् यक्व हे लिच्वः लाःगु धासें लकडाउन थपे मयायेगु बरु मेगु स्वरुप बियाः न्ह्याकेगु बिचाः न्ह्यःने तयादीगु खः ।

वय्कःयात नापलाना वःपिंसं प्रम ओली आः लकडाउन बढे यायेगु पक्षय् मदुगु संकेत बियादीगु खँ धाःगु दु । लकडाउन थपे मजुइगु जुयाः प्रम ओलीं पार्टीया स्थगित जुयाच्वंगु स्थायी कमिटीया बैठक तकं भदौ २६ गते च्वनेगु धकाः सःतेगु सहमति यायेधुंकूगु खँ धाःगु दु ।

मेखे स्वनिगःया स्थानीय सरकार व स्थानीय प्रशासन धाःसा लकडाउन खुल्ला यायेगु मनःस्थितिइ अझं मदुनिगु खँ सूत्रं धाःगु दु । छखे नगर दुने कोरोना संक्रमिततय् ल्याः धमाधम अप्वयाच्वंगु व मेखे स्वनिगः दुने ५००० शैयाया क्वारेन्टाइन दयेकेगु ज्या अझं क्वमचाःनिगु कारणं लकडाउन थपे याये मालीगु बिचाः न्ह्यःने हयाच्वंगु खँ सीदुगु दु ।

लकडाउन बारे निर्णय यायेगु लागिं स्वनिगःया स्थानीय प्रशासन दथुइ थौं भर्चुयल मिटिंग च्वनेगु तयारी जुयाच्वंगु खँ सीदुगु दु । थौं च्वनीगु बैठकं हे थुकिया बारे निर्णय याइगु खँ नं सूत्रं धाःगु दु।