
ख्वप – उपन्यासकार रामशेखर नकःमिया बाखं मुनाः ‘सिमात फफस्वः’ आः नेपालभाषा नापं खय् भासं नं छगू हे जुयाः पिहां वइगु जूगु दु । वइगु फागुन २६ गते उकिया विमोचन जुइ । विमोचन नेपाल प्रज्ञा प्रतिष्ठानया कूलपति गंगाप्रसाद उप्रेती व नेपालभाषा एकेडेमीया चान्सलर चित्तरञ्जन नेपालीं मंकाः कथं यानादीगु खँ ग्वसाः खलः रामशेखर ग्वाहालि पुचलं धाःगु दु । पुचःया नायः नरेन्द्रभक्त हाडां कनादीकथं उकुन्हु हे पुचःया विघटन नापं रामशेखरया नामं मुंगु दांयात सिद्धिदास प्रतिष्ठानपाखें सञ्चालन यायेगु कथं छगू न्हूगु पुचः गठनया घोषणा नं जुइ।
‘सिमात फफस्वः’ बाखं मुनायात रामशेखर ग्वाहालि पुचलं प्रकाशन व भाषा अनुवाद यानाः पिथनेत्यंगु खः । उकिया लागिं ख्वपया च्याम्ह भाषा अनुवादक व साहित्यकारतय्त जिम्मेवारी बिउगु खः । उगु ज्या पूवनेवं आः उगु सफूयात नेपालभाषा व खस नेपाली भाषां नं दुथ्याकाः पिथनेगु तयारी यासें थुगु ज्याझ्वः यायेत्यंगु खः । ज्याझ्वः शनिवाः तलेजू बैंक्वेटय् जुइ ।
LEAVE YOUR COMMENTS