येँ (नेपालभाषा टाइम्स) – सत्तारुढ दल नेपाल कम्युनिष्ट पार्टी दुने ब्वलंगु ।।।सैद्धान्तिक विवाद’ अन्ततः पद विभाजनय् वनाः समाप्त जुइगु जूगु दु। विवादय् सहभागी जुयाच्वंपिं वरिष्ठ नेतातय् दथुइ आः याकनं हे मन्त्रिपरिषद् पुनर्गठन यानाः उकी थः मनूत दुथ्याकेगु सहमति जूगु दु ।
शीर्ष नेतातय् दथुइ जूगु सहमति कथं आः याकनं हे प्रधानमन्त्री केपी ओलीं मन्त्रिमण्डल पुनर्गठन यानादीगु जूगु दु। उकी वय्कलं पुष्पकमल दाहाल व माधव नेपालं सिफारिस याःपिं छुं मनूतय्त मन्त्रीया रुपय् दुथ्याकादी । लिसें विवादय् वयाच्वंपिं व भ्रष्टाचारय् लाःपिं धकाः नां वःपिं छुं मन्त्रीतय्त बिदा बीफु धाःगु दु ।
विवादया अन्तिम इलय् थःगु पक्षय् वयाः साथ बिउम्ह पार्टीया उपाध्यक्ष वामदेव गौतमयात थुपालय् शक्तिशाली मन्त्रालय सहित उपप्रधानमन्त्री दयेकेगु इच्छा प्रम ओलीं यानाच्वंगु खँ नं सीदुगु दु। अथे हे दाहालपाखें पार्टीया प्रवक्ता नारायणकाजी श्रेष्ठयात नं बांलाःगु मन्त्रालय सहित उपप्रधानमन्त्री दयेकेगु तयारी न्ह्याः वंगु खँ सूत्रं धाःगु दु ।
वंगु छुं ई न्ह्यवंनिसें शीर्ष नेतातय् दथुइ विवाद ब्वलनाच्वंगु खः । उकियात समाधान यायेगु लागिं शीर्ष नेतातय्सं हे मन्त्रिपरिषद् पुनर्गठनया उपाय लुइकूगु खँ धाःगु दु ।
देउवायात नं पदया हे चिन्ता
सत्तारुढ दल दुनेया ल्वापुयात पद मिलान यानाः समाधान यायेगु सहमति जूगु हे इलय् प्रमुख प्रतिपक्षी दल नेपाली कांग्रेसया सभापति शेरबहादुर देउवा नं म्हिगः वालुवाटार झायाः खाली जुयाच्वंगु थीथी संवैधानिक निकायया पदय् मनू नियुक्त यायेगु बारे खँल्हाबल्हा यानादीगु दु। अज्याःगु पदय् कांग्रेसया मनूत नं तयेमाःगु प्रस्ताव समेत देउवां तयादीगु खँ सीदुगु दु। नेपाली कांग्रेसया महाधिवेशन न्ह्यःने वयाच्वंगु जूगुलिं छुं छुं मनूतय्त थःगु पक्षय् हयेगु लागिं पद बियाः जूसां ह्ययेके माःगु जुयाः देउवा संवैधानिक निकायया खाली जुयाच्वंगु थासय् नियुक्ति यायेगु प्रस्ताव ज्वनाः वालुवाटार झाःगु अनुमान सूत्रं याःगु दु ।
LEAVE YOUR COMMENTS