पौभाः कलाकार प्रेममान चित्रकार मंत

येँ – नेपाःया परम्परागत चित्रकला (पौभाः) या नांजाःम्ह कलाकार प्रेममान चित्रकार थौं मंत । ताः ई न्ह्यवंनिसें दमया ल्वचं कयाच्वंम्ह भाजु चित्रकार थनया कलंकीइ च्वंगु नेशनल हस्पिटलय् वासः याकु याकुं थौं न्हिनय् मदुगु खः ।

वयकःया अन्तिम संस्कार थाैं हे पशुपतिइ याइगु खँ दु ।

भाजु चित्रकार पौभाः कलाया निपुण कलाकारया नापनापं नेपालभाषाया अनन्य सेवक व च्वमि नं खः । वय्कलं नेपालभाषाया आपालं कविता व म्ये च्वयादीगु दुसा वय्कःया म्ये सफू नं प्रकाशित जूगु दु । लिसें वय्कलं नेवाः संस्कृतिया बारे नं आपालं फुटकर च्वसुत च्वयादीगु दु । अथे हे नेवाः समाजय् पुं (चित्रकार) तय्सं याइगु थीथी सांस्कृतिक ज्या व नेवाः संस्कृतिइ पुंतय्सं च्वइगु चित्रया महत्वया बारे नं सफू च्वयादीगु दु ।

वय्कः राजकीय प्रज्ञा प्रतिष्ठानं बीगु इन्द्रराज्य प्रज्ञा पुरस्कारया नापं आपालं सिरपालं विभूषित नं जुयादीगु दु । भाजु चित्रकारं नेपाःया आपालं ल्याय्म्हपिं कलाकारतय्त पौभाः च्वयेगु कला स्यनादीगु दु ।

वय्कःया जहान लिसें स्वम्ह म्ह्याय् व छम्ह काय दी । वय्कःया जहान लिसें काय–म्ह्याय्पिं नं सकलें पौभाः च्वज्यालिसे हे आवद्ध जुयादी ।
कलाकार चित्रकार ७६ दँ दुम्ह खः । वय्कः ने.सं. १०६५ (वि.सं. २००१) य् मां चन्द्रमाया चित्रकारया कोखं बूगु खः । वय्कःया अबु पृथ्वीमान चित्रकार नं नांजाःम्ह कलाकार खः ।