डोरमणियात मुख्यमन्त्रीं चीकेत पहल सुरु

येँ (नेपालभाषा टाइम्स) – बागमती प्रदेशया सरकार पुनर्गठन जुइगु तयारी शुरु जूगु खँ सीदुगु दु। प्रदेशया मुख्यमन्त्री डोरमणि पौडेलयात चीकाः मेम्हेसित मुख्यमन्त्री दयेकेगु लागिं प्रदेश सभाया सांसदतय्सं पहल न्ह्याकूगु खँ सूत्रं धाःगु दु ।

मुख्यमन्त्री पौडेलं प्रदेश विकासया लागिं छुं हे भूमिका मम्हितूगु जूगुलिं वय्कःया विरुद्ध ताः ई न्ह्यवंनिसें हे सः थ्वया वयाच्वंगु खः । छुं ई न्ह्यः तिनि मुख्यमन्त्री पौडेलं सार्वजनिक रुपं हे थः विरुद्ध छुं सांसदतय्सं हस्ताक्षर अभियान शुरु याःगु धासें थःत चीकेगु लागिं थःगु हे पार्टीया सांसदतय्सं षडयन्त्र यानाच्वंगु धकाः आलोचना यानादीगु खः । वय्कःया थ्व धापूयात कयाः नेकपाया हे सांसदतय्सं असन्तुष्टि प्वंकुसें वय्कः मुख्यमन्त्री जुइत लायक मजू धकाः केन्द्रीय राजधानी येँय् समेत उजुरी वयेगु शुरु जूगु खः । मुख्यमन्त्री पौडेलं थः विरुद्ध असन्तुष्ट जुयाच्वंपिं सांसदतय्सं थःत चीकेगु लागिं हस्ताक्षर हे शुरु यानाच्वन धकाः द्वपं बिउगुलिं सांसदत तम्वयाच्वंगु खँ सीदुगु दु ।

मुख्यमन्त्री पौडेलं हेटौंडायात हे स्थायी राजधानी दयेकेगु ज्याय् थः याकःचां जक भूमिका म्हितागु धकाः उकिया सम्पूर्ण श्रय थम्हं जक कायेगु कुतः यानाच्वन धकाः नं सांसदतय्सं असन्तुष्टि प्वंकाच्वंगु दु। सूत्रया कथं मुख्यमन्त्री पौडेलं बांलाक ज्या याये मफुगु खँय् प्रधानमन्त्री केपी ओली समेत सन्तुष्ट जुयादीगु मदुनि । प्रम ओलीं समेत वय्कःयात चीकेगु लागिं सकारात्मक संकेत बियादीगु खँ नं सूत्रं धाःगु दु ।

वय्कः धुंकाः मुख्यमन्त्री जुइगु लागिं आः येँयाम्ह अष्टलक्ष्मी शाक्यं कुतः याना च्वनादीगु दुसा धादिबयाम्ह राजेन्द्र पाण्डें नं कुतः याना च्वनादीगु खँ सूत्रं धाःगु दु। पाण्डे प्रम ओलीया समर्थक खःसा शाक्ययात ओली विरोधी कथं कायेगु याः ।

सम्बन्धित बुखँ

LEAVE YOUR COMMENTS