नेपालय् अनलाइन यौन हिंसा विरुद्ध न्हिं १५० गू उजुरी

येँ (नेपालभाषा टाइम्स)- मिसायात सम्मान यायेगु व मिसा अधिकारया खँय् सचेतना ज्याझ्वःत नियमित रुपं जुयाच्वंसां अनलाइन माध्यमपाखें मिसातय्त जुइगु हिंसा धाःसा न्हियान्हिथं अप्वया वनाच्वंगु दु । थौंकन्हय् नेपाल प्रहरीया साइबर ब्युरोय् न्हिं १५० गू धइथें अनलाइन हिंसा सम्बन्धी उजुरी दर्ता जुइगु जुयाच्वंगु दु ।

नेपाल प्रहरीया कथं वंगु न्यादँ न्ह्यःया ल्याःचाः स्वयेगु खःसा थौंकन्हय् नेपाःया मिसातय्त खुदुगं अप्वः साइबर हिंसा जुयाच्वंगु दु । अनलाइन हिंसाया दकलय् अप्वः शिकार मिसा व मस्त जुयाच्वंगु खँ नं प्रहरीं धाःगु दु ।

विशेष यानाः मिस्तय्त जुइगु हिंसाय् अश्लील ढंगं हायेकेगु, प्रेम प्रस्ताव वा यौन प्रस्ताव तयेगु, माने मजुल धाःसा ख्याच्वः बिया हयेगु, कर्पिनि नग्न किपाय् मिसाया किपा जोडे यानाः छ्वया बीगु थेंज्याःगु गतिविधि अप्वः जुयाच्वंगु दु । थज्याःगु ज्याखँया कारणं सार्वजनिक रुपं बेइज्जत जुइगु, चरित्र हत्या जुइगु, ख्याच्वः वइगु आदि कारणं यानाः मिसापिंत मानसिक तनाव समेत जुयाच्वंगु लूगु दु । मिसापिंत अनलाइनं चारित्रिक द्वपं बीगु, ख्याच्वः बीगु, अश्लील शब्दं ब्वः बीगु, ज्यान कायेगु व बलात्कार याना बीगु धइगु तक नं ख्याच्वः वयेगु जुयाच्वंगु दु ।

इन्टरनेटया अप्वयाच्वंगु छ्यलाबुलां यानाः मनूतय् अप्वः धइथें क्रियाकलाप आः अनलाइनय् रुपान्तरण जुयाच्वंगु दुसा मिसातय्त जुइगु हिंसा नं अप्वया वनाच्वंगु दु । सामान्य रुपं तइगु प्रेम प्रस्ताव अस्वीकार यात धकाः तकं अनलाइनय् मिसापिंत ट्रोल याइगु समस्या अप्वयाच्वंगु दु । सरकारं दयेकाच्वंगु विद्युतीय कारोवार ऐनं थुकी कडाइ याइगु आशा यानाच्वंगु दु ।