अवैध स्वापूया लिच्वः – छ्यं ध्यनाः हत्या

येँ (नेपालभाषा टाइम्स) – थनया ग्वंगःबुँइ छ्यं व तुति समेत पालाः वांछ्वयातःगु लाश सम्बन्धी रहस्ययात नेपाल प्रहरीं ४८ घौ दुने हे समाधान याना बिउगु दु। उगु घटनाया मू दोषी कल्पना मुडभरी पौडेलयात ज्वनेवं घटनाया सम्पूर्ण विवरण पिहां वःगु खःसा प्रहरीं म्हिगः छगू पत्रकार सम्मेलन यासें दोषीयात सार्वजनिक याःगु खः ।

अभियुक्त पौडेलयात प्रहरीं चितवनय् वनाः ज्वना हःगु खः । वं बयान बिउ कथं घटनाय् लानाः सीम्ह रोल्पाया कृष्णबहादुर बोहरां नकली फेसबुक आईडी दयेकाः पौडेलया पुलांगु फोटो पोष्ट यायेगु, नग्न फोटोत छ्वया हयेगु व थःगु सम्बन्ध बारे कना बी धकाः ब्ल्याक मेल यानाः अवैध सम्बन्ध तयेगु ज्या यानाच्वंगु कारणं कायल जुयाः स्याःगु खः । बोहरालिसे थःगु आर्थिक कारोवार दुगु खँ नं पौडेलं कंगु दु ।

पौडेलया भाःत विदेशय् दुसा थौंकन्हय् भाःतलिसे वयागु स्वापू बांलाः मजू । वया १५ दँया म्ह्याय् व चीधीम्ह काय दु। बोहरायात स्यायेधुंकाः लाश वांछ्वयेगु ज्याय् म्ह्याचं नं ग्वाहालि याःगु जूगुलिं प्रहरीं म्ह्याय्यात नं ज्वंगु दु। तर नाबालक जूगुलिं वयागु नां पित मबिउ। पौडेलं बोहरायात नये–त्वने यायेगु धकाः छेँय् सःताः स्याःगु खः ।

सीम्ह मनूया छ्यं व तुति समेत ध्यना तःगु जूगुलिं थुकी मेपिं मनूतय्गु नं ल्हाः दयेमाः धकाः प्रहरीं अनुमान याःगु खःसां आः तकया अनुसन्धानं धाःसा कल्पना याकःचां हे थ्व घटना याःगु खनेदु धाःगु दु । घटना बारे बयान न्यनेधुंकाः प्रहरीं थुकियात फिल्मी कहानी थेंज्याःगु घटना धाःगु दु। आः कल्पनायात मनू स्याःगु व वया म्ह्याय्यात स्यायेगु ज्याय् ग्वाहालि याःगु धइगु द्वपं बियाः मुद्दा चले यायेत्यनागु खँ प्रहरीं धाःगु दु ।

सम्बन्धित बुखँ

LEAVE YOUR COMMENTS