ज्याकू चाल, यातायात मचाः

येँ – लकडाउनया कारणं बन्द जुयाच्वंगु सरकारी ज्याकू ८२ न्हु लिपा चायेकेगु तयारी सरकारं याःगु दु । तर सरकारी ज्याकू चायेकूसां सार्वजनिक यातायात खुल्ला मयाःगु व निजी सवारी साधनय् नं जोरबिजोर प्रणाली लागू यानातःगुलिं ज्याकुथी वनीपिं कर्मचारीत अन्यौलय् लानाच्वंगु दु ।

सरकारी ज्याकू चायेकेगु धाःसां यातायात पूर्ण रुपं खुल्ला मजूनिगु कारणं सेवाग्राहीतय्त नं समस्या जुइगु खनेदु । उकिं सेवाग्राहीं फोन, ईमेल वा बैंक मार्फत थःगु ज्या याये फइगु व्यवस्था नं सरकारं यायेत्यंगु दु ।

सरकारी ज्याकू चायेकूसां सकलें कर्मचारीत छक्वलं वयाः ज्या याये मजिउगु कारणं सुथय् ८ निसें १ बजे तक छगू शिफ्ट व १ बजे लिपा मेगु शिफ्ट यानाः निगू शिफ्टय् ज्या याकेगु तयारी सरकारं याःगु खः ।

ज्याकुथी ल्हाः सिलेगु लः, स्यानिटाइर व मास्कया धाःसा पूर्ण व्यवस्था याःगु दु । आः गुलि नं ज्याकू चाली अन फुकस्यां अनिवार्य मास्क तये माःगु, दुहां वयेवं ल्हाः सिलेमाःगु नियम दयेकूगु दु । उकिया लागिं माःगु ज्वलं फुक्कं ज्याकुथिं हे व्यहोरे याइ । मेखे निजी बैंकत नं म्हिगःनिसें ज्याकू अवधि हे चायेकेगु ज्या जूगु दु ।